Dialuna a atende e cambionan den e ley di LAFT den parlamento di Aruba. A ley riba su mes a conta cu diesnuebe voto na fabor, tabata falta dos miembro den sala, esta Arthur Dowers y Benny Sevinger di AVP. E dosnan aki ta haya ta bon di bay cu vakantie prome cu tempo.
En fin, durante e reunion publico e Minister di Finansa, mr. Xiomara Maduro a elabora un poco riba e historia y conseho di College Aruba financieel toezicht (Caft). Durante su contestacion riba miembro di parlamento, Miguel Mansur di Accion21, el a conta cu mester tene cuenta cu tipo di hende asina. E mandatario a comenta cu: “Tipo di hende asina bo mester tin miedo pa nan haya un krenchi di holor di poder”. Mansur lo a comenta cu Minister Maduro mester a move shelo y tera e tempo ey mirando cu tabatin un Koninklijk Besluit (KB) ta colga riba e cabes di e mandatario.
E mandatario a sigui comenta cu si CAft tabata asina bon, awe e no lo ta para como minister ainda. Segun Maduro, CAft tabata asina bon te cu e propio presidente, drs. Raymond Gradus a tuma honor na su mes y bandona e funcion door di tuma su retiro. Si CAft tabatin tur nan rason, masha rato e minister di finansa di Aruba lo mester a bay cas. E diferencia entre Maduro y Gradus ta hopi, segun e mandatario a expresa. “Kiermen, prome cu papia bobedad, tin cu analisa prome”, asina e mandatario a termina bisando.
Tocante Xiomara Maduro
Xiomara Jeanira Maduro ta naci dia 24 di december 1974, a participa den eleccion Parlamentario pa prome bes na aña 2009 y a haya 260 voto individual. E tempo ey el a asumi e puesto di Parlamentario pa Fraccion di MEP. Su popularidad a crece casi 10 biaha mas hopi den eleccion 2013, logrando no menos di 2445 voto riba su nomber y a sigui den funcion di Parlamentario.
Den eleccion na september 2017, el a aparece como candidata # 2 riba lista di MEP y a haya 2696 voto. Dia 17 di november el a huramenta como Minister di Finansa, Asuntonan Economico y Cultura den Gabinete Wever-Croes, forma pa e coalicion di MEP(9), POR (2) y RED (1). Den e ultimo eleccion, Xiomara Maduro a baha den voto y a yega na 1883 voto, un caida di mas cu 30%.
Tocante CAft
Riba dia 2 di september 2015 a institui College Aruba financieel toezicht (CAft), conoci tambe como Colegio di Supervision Financiero Aruba. Nan tarea ta encera monitor y duna conseho, riba adaptacion y ehecucion di presupuesto di pais Aruba, kedando den balans y den e limitenan acorda, pa por cumpli cu pago di debenan. CAft por duna conseho sea cu Gobierno a pidi of no.
