Dialuna anochi diesnuebe parlamentario a aproba e Landsverordening Aruba tijdelijk financieel toezicht (LAft). Pero durante e tratado aki tres fraccion, esta AVP, ACCION21 y RAIZ a entrega un mocion, di cual ta pa negosha e debe cu Hulanda y pa hinca esaki den un fondo di inversion pa Aruba. Pero, e mocion aki no a conoce sosten.
Lider di Fraccion di AVP a indica di ta gradici na e fraccionnan di RAIZ y ACCION21 pa hunto cu nan a entrega e mocion. Esey ta un señal di un sentido di responsabilidad, pasobra un fraccion di MEP a bay contra pa motibo cu nan gobierno no a bin cu e idea. Of otro pensamento pa locual ta 916 miyon florin cu Aruba tin di paga Hulanda bek.
E ta kere cu cualkier hende di sano huicio cu tin un sentido di amor y responsabilidad p’e pais aki no por a vota contra e mocion aki. E mocion cu nan a entrega tin di haber pa gobierno negosha cu Hulanda riba e 915.5 miyon di florin cu tin di paga bek y pa hinca esaki den un fondo di inversion pa Aruba.
Aunke cu AVP a entrega e mocion, esaki a haci un diferencia pasobra no tur parlamentario tabata presente. E lider di fraccion a indica cu dos di nan miembro a haci compromiso adelanta y e idea no tabata cu parlamento lo a sigui te dia 18, pero algun a scoge e momento pa bay Hulanda. Su persona a bay Hulanda, pero no a spera cu e presidente tambe a haci esey. Y door di esey a pospone tur reunion.
E parlamentarionan Benny Sevinger y Arthur Dowers tabatin compromiso cu nan famia haci. E ta di pensamento cu si e dos parlamentarionan aki tabata presente lo a haci diferencia y e mocion lo a pasa.
drs. Mervin Wyatt-Ras, parlamentario, a indica cu e fraccion cu ta sostene gobierno asina mes a distancia su mes un rato pa asina mira interes general di Aruba. Wyatt-Ras ta lamenta cu e otro personanan, otro fraccion manera MAS, di cual el a keda sorprendi, cu no a sostene e mocion. A tuma nota cu Xiomara Maduro den su contestanan tabata mustra cu dede na e miembronan di parlamento, incluso di su fraccion y coalicion, pa no vota p’e mocion.
Maduro a menasa nan eynan, pa despues cuminsa papia di bomba, sclavitud di bomba. Segun e parlamentario, bomba hopi bes ta un traidor. E minister a acusa e miembronan di su partido si vota p’e mocion, nan ta un traidor.
ir. Mike de Meza, parlamentario (AVP), a indica ta tristo di mira y incomprendibel con por tin fraccion cu ta bay contra pensamento di mocion cu por scapa Aruba mas di 900 miyon di florin.
Wendrick Cicilia, medewerker di AVP, a expresa cu Hulanda ta bin impone su exigencianan pa falta di vision y un alternativa di pais Aruba como e gobierno.
Esaki ta e rol importante cu partido AVP tin den e discusion aki. Semper nan ta presenta idea como vision y ruta alternativo con pa resolve e problemanan cu tin.
