Lotto pa Deporte no kier contribui mas cu deporte, segun Minister Dangui Oduber. E ta sigui splica cu no ta husto cu asina hopi entrada ta wordo genera y gran mayoria di e placa ta bay Canada.
Canada ta un pais economicamente hopi stabiel. Nan facilidadnan deportivo ta “state of the art”, compara cu Aruba, cual ta hopi lamentabel cu tin un grupo Arubiano cu ta forma parti di e directiva.
Gobierno ta bogando pa deporte haya mas placa, pa deporte haya su fair share. Na final di dia, mas entrada haya, mas por inverti no solamente den infrastructura, pero den desaroyo di nos propio deportistanan tambe, cual ta hopi importante pa nan futuro desaroyo como persona. Esaki Minister encarga cu Deporte Dangui Oduber ta splica den un declaracion.
Fundacion nobo
Tin un cambio di ley a tuma luga den Parlamento. E reunion publico no a wordo yama ainda pa vota riba dje, pero ta keda na e minister su pensamento. E mandatario ta haya cu mester bin competencia pa Fundacion Lotto pa Deporte. Ya caba nan a adverti gobierno cu si Gobierno sigui cu e plannan cu tin deseo di haci, esta cambia ley pa bin competencia, Fundacion Lotto pa Deporte a laga sa cu nan lo haci un claim miyonario contra pais Aruba.
Segun nan pensamento, nan tin exclusividad riba benta di Lotto na Aruba, cual esey no ta e caso. Na momento cu e organo di mas halto di un pais, esta Parlamento di Aruba dicidi pa cambia un ley, logicamente nan ta liber pa bay busca e caminda di Corte pa cuminsa un proceso pa impedi esey.
E minister ta pensa cu ta dificil cu nan por haya rason, pasobra ta e organo mas halto di Aruba ta dicidi pa cambia un ley, pa habri e mercado, pa bin competencia, cu ta sano. Na e momento aki nan kier tin monopolio. Awo si tin monopolio y ta contribui manera debe ser na deporte, ta un otro cuenta.
Pero no por tin monopolio y tur facilidad deportivo na Aruba ta den un super mal estado. “Nos stadionnan ta wordo desaproba. Federacionnan deportivo, tur ta pidi mas placa. Dado momento Gobierno a tuma e decision pa encamina e proceso pa cuminsa explora e posibilidad, cambia ley y cuminsa cu un fundacion nobo pa finalmente bin un competencia. E ley ta na Parlamento. E minister ta spera cu e por wordo trata dentro di algun siman, pa asina en todo caso e cambio di ley por tuma luga, cu Lotto pa Deporte no tin e exclusividad mas, sino bin cu competencia, pa asina ey nos comunidad tin e escogencia. Sea bo ta cumpra bo Lotto cerca Fundacion Lotto pa Deporte, caminda 80% di entrada ta bay pa e grupo Canades cu ta doño di Fundacion Lotto pa Deporte, of bo ta cumpra Lotto cerca e fundacion nobo y 100% di e entradanan aki ta bay bek den deporte manera e mester ta.”
E ta un modelo di haci negoshi. Gobierno no tin problema cu e grupo Canades ta gana placa cu e modelo di haci negoshi aki, pero no por ta asina cu tin un reparticion cu no ta husto, caminda gran mayoria di e placa ta bay pa e Canadesnan y deporte ta keda cu un hap hopi chikito di tur e entradanan cu ta wordo genera, e mandatario a splica.
