Den cuadro di e diferente proyectonan tumando luga rond di Aruba, Minister Ing. Mike de Meza a splica con importante ta pa sigui duna atencion na e area pariba di brug. E refineria semper a sostene economia na San Nicolas. Historicamente impacto di e refineria tabata grandi pa nos economia pero mas cu tur cos e tabata e motor economico di tur locual a tuma luga na San Nicolas, asina Minister de Meza a splica.
Lastimamente ora e refineria a cera na 1985 a conduci na un cambio drastico pa economia di San Nicolas. Por a mira cu un motor a wordo rehabilita den añanan 90 y su impacto tabata sumamente grandi y positivo pa San Nicolas atrobe. Na 2009 ora a tuma e decision pa stop operacion, a mira e caida atrobe den economia en general, pero sigur den e parti di San Nicolas.
Na momento cu a start up bek na final di 2010 por a nota su impacto positivo di biaha den e area di San Nicolas. Na maart 2012 lastimamente ora a cera porta atrobe por a mira un bes mas con importante e operacion di e refineria ta pa Aruba. Awor aki mirando e desaroyonan tumando luga pa cu e rehabilitacion di e refineria, ya por mira e fluho di positivismo cu esaki ta trece cune. Caminda ya caba inversionistanan cu ta mira e efecto positivo aki, a cuminsa inverti bek den San Nicolas cumprando companianan existente y otro cu ta creando companianan nobo. Esaki a sa di trece movecionnan grandi pa San Nicolas y vecindario, asina Minister Mike de Meza a splica.
Ta keda importante pa Pariba di nos isla tin motornan cu ta yuda inverti den e economia di San Nicolas. Mas ainda mirando cu San Nicolas ta un ciudad caminda hopi famianan ta biba, di cual algun ta traha na e refineria, pero un gran parti di e famianan di San Nicolas ta traha den e area hotelero di nos isla y hospital. Esaki ta trece un peso grandi cune riba e bida familiar. Hopi ta esunnan cu dor di e limitacion den transporte, tin cu sali hopi trempan for di cas pa bay traha y ta yega cas bek te den oranan laat di anochi y esaki no tin mucho bon efecto pa e bida socioeconomico pa San Nicolas y ta trece su deficiencia social tambe cune.
Dor di crea mas oportunidad na San Nicolas, e lo duna e ciudad e ‘boost’ pa crece hopi mas. Mirando cu e hendenan di San Nicolas ta conoci pa ta personanan cu ta traha masha duro mes y cu a sa di sostene tur dos industria grandi na Aruba , tanto e refineria como e sector turistico, ta mas cu claro mester aloca lo necesario pa crea e necesidadnan basico na San Nicolas. Dor di crea un tiki mas di e sector turistico pa e parti pariba di brug, sin cambia e identidad autentico di San Nicolas, lo garantisa sigur un futuro briyante pa tur cu ta bibando na San Nicolas.
Mester percura pa pariba di brug ta provee servicionan di calidad. Mester eleva e calidad di infrastructura cu lo sa di atrae inversionistanan pariba. Infrastructura di telecomunicacion, caretera y cayanan cu mester ta bon, mester por tin e servicionan primario di calidad, mester tin atencion medico adecua y no ta trata aki solamente di dokternan di cas, pero tambe mester actualisa e centro medico, e Warda di Polis mester ta na un nivel halto, pa polisnan Pariba di nos isla tambe tin e hermentnan cu nan mester pa eherce nan trabou na e miho manera posibel. Pa di e forma aki nan por garantisa semper
ordo publico riba nivel cu lo contra aresta criminalidad pa asina aki hendenan pariba tambe sinti nan mes feliz y sigur den nan cas. Esaki ta e partinan basico cu mester sigui traha riba dje pa San Nicolas y su hendenan.
Minister de Meza a splica cu a percura tambe pa drecha e facilidadnan deportivo, manera Joe Laveist, caminda a haci fase 1 y 2 y actualmente ta bay cuminsa cu fase 3 caminda lo bay introduci parkenan familiar, mescos Carnival Village, Lago Height Hill Park y Lago Height Baby Beach cu mester wordo finalisa. Asina aki tin diferente proyectonan cu mester wordo finalisa y concretisa y e ora lo bay mira cu e spinoff lo ta uno grandi pa San Nicolas y vecindario.
Tur e desaroyonan aki ta haci cu comunidad di San Nicolas completo lo forma parti di e transicion di progreso pa bienestar. Aki por referi na proyectonan manera de Vuyst y Yuwana Morto complex cu a wordo eleva. Papiando aki di un bario manera de Vuyst cual tabata den un estado deplorabel, cu awor aki a wordo drecha tambe y a bira un bario nobo y bunita. Pues di e forma aki ta laga e prosperidad yega na cas di cada persona.
E prosperidad aki ta motiva e ciudadanonan tambe y ta haci cu nan ta sintinan mes respeta, motiva y en curasha pa lanta mainta cu un gana pa hiba nan famia dilanti pero nan pais tambe. E ciudadano cu ta sinti bon lo duna un bon servicio na nivel di su producto Aruba!
