Den fin di siman Minister Ing. Mike de Meza a celebra e di 55 aniversario di independencia di Jamaica. Rond mundo Jamaikinonan a celebra nan dia nacional, dia di nan independencia, cu tradicionalmente ta bay compaña cu hopi musica, cuminda tradicional y baile. E aña aki na Aruba a celebra e evento special aki na Oneil’s Restaurant na San Nicolas, unda Jamaikinonan a topa eynan pa celebra hunto cu nos Arubianonan. “Jamaica ta un di nos islanan ruman den Caribe. Pesey nos mester celebra cu nan, specialmente pasobra nan ta rico na historia, na cultura, nan ta orienta riba famia y ta cushina masha bon mes”, asina e mandatario, cu ta biba na San Nicolas, a duna di conoce durante e celebracion aki. Jamaica ta un di e prome islanan cu a logra nan independencia den Caribe. A felicita Jamaica y specialmente e Jamaikinonan biba na Aruba.
