drs. Mervin Wyatt-Ras a trece padilanti cu e pashentnan no por mas cu pago di e remedinan ya cu nan cartera ta bashi. Segun Mervin Wyatt-Ras cuido medico ta hopi importante pa un comunidad y sigur pa pais Aruba. Durante conferencia di prensa dilanti Dr. Horacio E. Oduber Hospital, e parlamentario a trece padilanti cu e renobacion y ampliacion di nos hospital, cual ta un hoya di proyecto, a inicia bou di Gabinete Eman.
Sinembargo gobierno na mando desde 2017 no kier a continua cu e proyecto aki. Door di presion di CAft e minister actual, Dangui Oduber, ta hay‘e obliga di finalis’e. Si cana den hospital por mira con bunita e parti cu a ser renoba ta y cu aparato moderno. E sosten, ayudo y cuido den hospital tambe ta ser duna door dje profesionalnan medico cu dedicacion y ta di bon calidad. Wyatt-Ras recientemente tabatin un experiencia positivo cu familiar cu tabata interna. P’esey no ta cuadra cu aunke cu gobierno ta anuncia cu tin un surplus den presupuesto, toch di otro banda ta keda corta den cuido medico y otro tereno, den cual netamente ta necesario mas inversion.
Nos ciudadanonan ya no por mas. Tin famia cu no tin ni pan pa pone ariba mesa di nan yiunan. Tin famia cu no por paga nan debenan y no por paga nan cas. Prijs di awa, coriente y gas a subi drastico. Esunnan cu kier traha un cuminda di Pasco no por asina manera nan kier door di aumento di comestibel y di gas. Pan y hasta prijs di webo a subi. Schoolgeld tambe a ser hisa. Prijs di gasolin a subi y aki un par di dia nos lo tin cu bay core ariba burico. Esaki ta e realidad di nos hendenan.
Medicina ta hopi importante pa un persona cu tin enfermedad cronico, un acute stoornis of malestar. Na e momento ey ta hopi importante pa e persona por ricibi su medicina pa e por bira bon of recupera. Y esey tambe ta locual ta nos preocupacion. Tin persona cu no ta tuma e remedi cu ser receta pasobra nan no tin placa pa paga. Wyatt-Ras a haci pregunta na gobierno encuanto e cantidad di persona cu si ta ser vergoed. Pasobra gobierno ta bisa bunita cu e remedinan di esunnan cu tin enfermedad cronico ta ser vergoed, sinembargo no ta conoci e cantidad di e pashentnan ey. Tampoco ta conoci cuanto persona cu no tin enfermedad cronico tin cu paga pa nan remedinan. A puntra e cantidad aki.
Tin pashent a trece nan recibonan pa e parlamentario y su coleganan mira. E ta menciona un pashent cu a paga pa despues di un bishita na dokter mas o menos 50 florin pa par di remedi. Un persona cu no ta traha y no tin entrada suficiente no por paga esaki. Wyatt-Ras ta enfatisa cu e preocupacion di fraccion di AVP ta alabes e preocupacion di pueblo.
Banda di esaki Wyatt-Ras a trece su preocupacion padilanti pa loke ta trata e area di fysiotherapie. Fysiotherapie ta hopi importante pa un persona na momento cu e haya accidente of e tin un letsel of a haya un stroke. E persona cu no por move of mester rehabilita tin mester di ayudo profesional pa yud’e. Tambe ora ta trata muchanan cu tin un of otro limitacion cu mester ser stimula y haya yudansa pa cu movecion, ta necesario fisioterapia. P’e muchanan of esunnan cu un deficiencia of limitacion cu no por cana of tin dificultad cu movecion ta importante pa ser stimula desde chikito. Nan mester haya fysiotherapie riba base continuo. Esaki no ta posibel na e momento aki na Aruba, a pesar cu gobierno cada bes den su begroting ta menciona cu e ta cumpli cu SDG’s, esaki no ta e caso. E profesionalnan cu ta duna ehercicio y/of fysiotherapie hopi biaha ta ser lubida, segun Wyatt-Ras. Banda di tur specialismo fisioterapia lo mester haya debido atencion.
Wyatt-Ras ta menciona cu parlamento a ricibi un carta di nan caminda nan ta informa nos y nan ta pidi pa haya sosten pa hisa e cantidad di tratamento. Fraccion di AVP a manda pregunta dirigi na minister pa haya aclaracion y pa wak con pa hisa e cantidad di tratamento pa pashent. Nos ta haci un apelacion na gobierno pa yuda e specialismo aki. Wyatt-Ras alabes ta trece padilanti cu den nomber di su fraccion el a entrega un mocion cu a ser aproba unanimamente, pero cu te ainda no a ser ehecuta pa por haci posibel cu hobennan cu limitacion por haya fisioterapia. Si sigui corta den cuido dor di e gobierno aki lo haci cu mas specialista y otro profesionalnan medico lo bandona nos pais, locual lo baha e calidad di nos cuido drastico.
Ta sumamente bergonsoso cu nos partido cu a introduci AZV nan aña 2000 bou Gabinete Eman, tin cu experiencia con e gobierno aki ta caba cu e espirito di AZV. E ley di AZV ta haci posibel cu tur ciudadano tin derecho pa haya cuido medico na pais Aruba anto awor nos ta mira cu esaki no ta posibel. Si e gobierno aki sigui su curso nos lo bay mas atras y lo tin klassezorg of cuido di clase, den cual esunnan cu por paga so por haya e cuido medico. Esaki ta preocupante y inaceptabel.
Gobierno mester honra cu nos pashentnan tin derecho y si bo kier yena bo boca y bisa cu pashentnan tin derecho mester duna pashentnan en berdad nan derecho tambe.
Segun e parlamentario un djis lo trata den parlamento ley encuanto “Belastingsplan 2023”. Den e ley aki lo reglamenta subsidio di BBO cu 1%, Lo hisa e toeristenheffing di 9.5% pa 12.5% y lo bay corta den mercadeo di e pilar principal di nos economia cu ta nos turismo. Di tur entrada 40% lo bay den caha di gobierno y 57% so lo bay pa ATA. Aki lo haci nos turismo mas caro cu lo tin su impacto negativo ariba nos economia, inversionnan y tambe empleo di nos ciudadanonan lo bay ta na peliger.
Por mira claramente con e gobierno aki ta goberna. Pa nan por keda mantene nan gastonan di goederen en diensten halto y keda nombra nan amigonan y famianan den gobierno nan ta purba manda tur placa pa nan caha di gobierno sin importa e consecuencianan.
Asina tambe ta keda corta den cuido medico cu ta tocante e ader di nos pais. Nos mester garantisa cu nos hendenan tin salud pero e gobierno aki no tin amor pa nos ciudadanonan y nos salud. Gobierno a bay di acuerdo cu landspakket sin consulta cu pueblo. Evelyn Wever-Croes a bende nos autonomia. A bay di acuerdo cu Hulanda den sentido di corta den cuido. Asina e ta bisa pueblo. Sinembargo awor e ta obvio cu ta e gobierno aki mes tambe kier corta den cuido y tur otro tereno. Ya cu ta gaba cu tin un surplus pa 2022, lo mester por yuda cuido medico, special nos ciudadanonan den necesidad cu no por paga nan remedinan. Wyatt-Ras ta haci un apelacion na gobierno pa atende cu e area di cuido cu ta esencial pa bida di nos ciudadanonan. Si nos inverti awor den cuido toch tin cu carga consecuencia a lo largo, specialmente despues di COVID-19. Si nos sigui asina nos no por ni come, bebe, baña, ni bira malo y mester bay core riba burico, segun Parlamentario Wyatt-Ras.
