Riba e di dos dia InterExpo presentacion di e oradornan tabata accentua mas riba e desigualdad den reino y dificultad cu cada miembro ta pasando aden. Na final a combersa cu parlamentario Miguel Mansur, kende a laga bon cla cu aunke tin espacio pa mehoracion e structura di reino, otro isla no mester asumi ta cua ta e posicion di e pueblo di Aruba.
E parlamentario y lider di fraccion Accion 21 a scucha cu atencion e palabranan di, entre otro, representante di St. Eustatius cu ta boga pa e restauracion di nan gobierno democratico, mientras cu ex president di parlamento di St. Maarten ta papia di inicio un proceso di decolonisacion den un trayecto pa desmantelacion di reino.
Mansur tabatin pregunta skerpi pa su colega di St. Maarten pasobra kier compronde miho kico nan kier men cu decolonisacion. A trece dilanti cu e ta nifica cu ta cera e deficit democratico y e pais colonisado mester percura pa trece e colonianan na su mesun nivel socio-economico. E problema, segun Mansur, ta cu no ta existi un ehempel di esaki na mundo pa sigui.
Mientrastanto, na Aruba a realisa diferente encuesta riba e tema y for di nan a Sali na cla cu rond di 7% di nos poblacion ta desea un independencia absoluto, mientras cu 25% di e ciudadanonan kier pa Aruba bira un gemeente di Hulanda y e grandi mayoria di Arubiano kier mantene e Status Aparte caminda 82% kier un cooperacion mas estrecho cu Hulanda riba tereno di enseñansa y salubridad. “Mi ta trabou ta pa representa e interes di Aruba,” asina Mansur a indica.
E parlamentario ta admiti cu reino sigur no ta perfecto ya cu, den cierto forma, e ciudadano di e islalanan ta di segundo clase, tin racismo y ainda tin mentalidad colonialista. P’esey mes, e ta kere cu atende cu e deficit democratico ta hopi importante.
Pa e relato completo, lesa edicion di TREMPAN
