Anualmente Dr. Horacio E. Oduber Hospital Hospital ta analisa e bishitantenan cu a acudi na Departamento di Emergencia durante e weekendnan di fiesta. Aunke e aña aki Aruba a celebra fin di aña poco diferente y alabes cu un Toque de Queda, e cantidad di pashentnan cu a acudi, pa sea ricibi atencion medico na Departamento di Emergencia of dokter na warda, tabata 262 hende. Na aña 2019 esaki tabata 357 y na 2018 tabata 332. Pues casi 27% di menos pashent a yega e aña aki, si compara cu aña pasa.
Door di e atake cibernetico cu hospital a pasa aden na fin di 2019, a perde un ke otro informacion di e añanan anterior y pues no tin mucho material mas cu por compara.
E analisis a cuminsa dia 31 di december y a termina dia 3 di januari. Di e 262 persona, un total di 111 a ricibi atencion medico na Departamento di Emergencia y di cual 59% ta masculino. E edad di mas abou cu a atende na Departamento di Emergencia ta 1 aña y e pashent di mas grandi tabatin 92 aña. Y alabes e grupo di edad cu mas a acudi Departamento di Emergencia ta e entre 50 cu 64 aña.
Ta interesante tambe pa analisa e motibo di bishita durante e fin di siman di fin di aña. Di e 111 pashentnan cu a acudi na Departamento di Emergencia, 4 di nan tabata involucra den un accidente di trafico, 1 persona den incidente di violencia, 2 pa motibo di vuurwerk y 30 pa loke ta por ehempel caidanan, verzwik enkel, corta etc. E otro 74 casonan tabata pa motibonan cu no tin di haber cu traumanan fisico manera por ehempel un atake di curason, sacamento, un of otro infeccion, reaccion alergico etc.
Di e 111 pashentnan cu a acudi na Departamento di Emergencia, a admiti un total di 44 pashent den Hospital. Alabes mester bisa tambe cu 59% di pashent admiti ta masculino.
Hospital ta desea tur hende un aña 2021 feliz y yena di salud. Tambe corda cu e casonan ta subiendo pues ta urgi tur hende pa mantene na reglanan di DVG di distanciamento social, evita aglomeracion y haci uzo bon uzo di mask den luganan publico. Y si bo ta sinti un di e sintomanan, yama bo dokter di cas.
