Ta parce cu aña 2021 a cuminsa riba un mal pia ora cu pa exactamente 12:00am, durante pleno tiro, cu a constata morto di un homber cu algun minuut prome a yega cu un hinca den su pecho na IMSan. Mesora a start cu un investigacion penal tras di e sucedido aki, cu a conduci cu e mesun marduga a cuminsa detene sospechosonan. Ayera diadomingo den oranan di merdia a logra detene, loke ta pensa cu ta e sospechoso principal, cu a resulta di ta un mucha!
Tur cos ta indica cu el a hinca e homber mata bispo di aña nobo, cu consecuencia cu e victima a fayece net dia 1 di januari 2021, den habri di e aña nobo.
Tabata dr. Flemming cu a constata morto di e victima, cu a resulta di ta Rudolf G. RAS ta naci na Aruba 24 mei 1966. E tabatin apenas 54 aña di edad. Parce cu su amiga a trec’e IMSan y e tabata na tino ainda. No ta conoci si prome cu el a fayece e por a menciona nomber di e autor di e acto cruel aki ainda.
Pero diasabra mainta a habri cu e ekipo di recherchenan di San Nicolas trahando activo riba e caso penal aki. A cuminsa na detene hende den marduga caba y despues den oranan di mainta pa merdia atrobe a haci mas detencion na Rooi Koochi. Ta sospecha cu ta na un cas na Rooi Koochi e asesinato a tuma luga.
Informacion preliminar ta indica cu tabatin un fiesta na e cas, wardando cambio di aña. Ey lo a start un discusion cu a bay for di man y dado momento e hoben di apenas 15 aña di edad, un tal L.M., a saca un cuchiu y hinca e victima un solo biaha den su pecho. E hinca tabata asina profundo cu el a yega na curason di e homber cu consecuencia fatal. E asesino ta primo di e pareha di Rudy Ras, pues ta den famia mes!
Diasabra den dia polisnan a haci diferente detencion na algun adres. Pa merdia Lito Lacle a confirma cu na e momento ey tabatin 6 persona deteni, di cual 4 tabata Venezolano cu un status ilegal riba nos isla y un pareha local. Na momento di e entrevista Lacle a bisa mesora cu no ta descarta cu lo tin mas detencion den e siguiente oranan pasoba e 6 personanan ta dunando declaracion. Probablemente tur 6 lo a indica ken ta e autor di e asesinato aki riba Bispo di Aña nobo, cu a haci cu e recherchenan a haya aprobacion di Fiscal pa bay su tras.
Diadomingo mainta a sigui cu e investigacion y a sali e ordo di detencion pa e hoben L.M. pero no a logra topa cu ne. Su famia a indica cu e ta coriendo den un auto marca Nissan modelo March pero cu nan no sa su paradero. Asina polisnan a keda busc’e te cu a topa cu e auto den Mabon diadomingo merdia. A dun’e instruccion pa para e auto pero el a opta pa sigui core, purbando pa scapa di husticia. E tabata den auto cu un amigo mas, mayor di edad. Dado momento patruyanan di polis a chang’e di tur banda y el a hay’e ta para e auto y a baha abou pa nan detene tur dos. Un rato despues a laga e amigo den libertad pasobra e no tin nada di haber cu e caso di asesinato.
E hoben aki awor lo mester duna cuenta di su acto dilanti polis. Nan a colecta tur e pruebanan pa presenta e sospechoso dentro di poco dilanti un hues comisario pa mustra kico tin contra e hoben pa despues sigui cu e caso te na un hues. Lo tin cu dicidi awor si ta trat’e como un mucha of como un adulto. Den casonan asina, hues ta dicidi, a base di su comportacion y ecalua si e tin un carchi di castigo caba, pa mira si e ta keda cera te dia su caso bin dilanti of ta lag’e den libertad condicional.
Nos lo sigui e caso aki di cerca y lo mantene nos usuarionan informa di desaroyonan di e caso lamentabel aki.
