Nancy Kock, un wela/voogd preocupa pa un situacion cu a sosode na scol na momento cu a vacuna su nieta sin su permiso. El a un carta di scol pidiendo permiso pa e mucha haya un prik.
Kock a conta cu ora el a haya e carta, el a yena tur dato di e mucha y a pone specificamente cu e NO kier pa nan vacuna su nieta y a entrega e carta bek na director di scol.
Ayera, su yiu a yama pa pidie pa busc’e na scol pasobra ful e klas ta den cuarentena. E mama a busc’e, pero ora nan tabata rib’e caminda di Morgenster, e yiu a bisa su mama: “Mami wak, mi a haya un prik.”
Nancy a bay scol bek y a haya e maestra na scol p’asina papia cu ne. Nancy a splica e maestra cu el a manda e carta bek den luna di november bisando cu e no ta desea pa su yiu haya prik y
tambe el a splica e motibo dicon.
Segun Nancy Kock, e maestra a bis’e cu trahado di Directie Volksgezondheid (DVG-Preventieve Gezondheidszorg (PGZ) a bisa cu a yama e mama, mientras cu Nancy ta bisa cu ningun hende a yam’e. Nancy a bay e edificio na Playa, pero a mand’e bay un oficina situa den cercania di Kooyman. Ora el a yega na sitio, un señora a atend’e y bis’e cu e momento ey no tabatin hende na oficina debi cu nan ta ocupa cu e scolnan dunando prik.
Nancy a laga sa cu e no ta desea di papia di e asunto, e ta prefera pa papia personal. E ta hopi rabia cu e situacion.
DECLARACION DI E YIU
E yiu a bisa su mama, cu na momento cu nan a dun’e prik na scol, e señora a mustr’e e carta y el a wak cu ta poni un NO riba dje, pero asina mes a bisa e yiu cu el a papia cu su mama. E trahado a yama Nancy y a splic’e cu e lo papia cu Nancy na momento cu su hefe t’ey. Un biaha mas Nancy a informa cu e no ta desea di papia na telefon, sino personalmente.
NO TA KERE DEN VACUNA
E mama, hopi rabia, a bisa e trahado di e departamento concerni cu e tin 10 aña cu e no ta kere den vacuna. E no lo por duna su yiu un prik siendo cu mama di e mucha a fayece 9 aña pasa pa un prik. Nancy no tin buki di vacunacion di e mucha, pues e no sa ki prik su mama a yega di dun’e y no por dun’e un prik sin cu e sa ta kico tin den dje. Awo nan a dun’e un prik sin cu Nancy sa ta kico tin den dje. Un otro preocupacion cu e tin ta cu diripiente cu e klas a haya vacuna, tur mester a bay cas den cuarentena.
KICO LO PASA AWO
Nancy lo sigui cana su caminda. E ta sinti cu e situacion no por keda asina. No por ta posibel cu e ta skirbi riba e carta cu NO, pero toch otro persona ta dicidi di prik su yiu. E mucha ta sinti su brasa poco stijf. Nancy lo evalua con e ta sigui despues di e prik cu el a haya.
E MOTIBO
Nancy ta bisa cu e no ta kere den ningun prik. “Un prik a mata mi yiu muhe”, asina Nancy a expresa su mes. P’e motibo ey e no ta kere den prik. Ningun hende lo saca e pensamento ey for di su cabes. E no ta kere den vacuna contra di Covid-19 tampoco. E no sa ni cua hangua nan a duna e mucha.
E RESPONSABEL
Nancy ta pone e departamento Preventieve Gezondheidszorg (PGZ) responsabel pa prik su yiu sin autorisacion. E no ta culpa e maestronan, debi cu den luna di november, segun Nancy, ora el a papia cu nan, nan a bis’e cu no ta vacuna di Covid e mucha lo haya. Su palabra ta keda no pa cualkier prik.
SU RECOMENDACION
Cada mayor ta responsabel pa su yiu. E ta sinti cu no a respeta su decision. Dia cu Gobierno y DVG ta dicidi ken ta haya vacuna of kende no ta haya, cu autorisacion of sin autorisacion, e ora kiermen cu Aruba a bira un pais totalitario of comunista, den cual como mayor abo no tin nad’i bisa mas riba bo mesun yiu!
