Na Bogota, Colombia, 24ora.com a presenta pa un cobertura exclusivo di un recepcion cu a tuma luga na Holland House. Esaki ta un camara di comercio entre Hulanda, teritorionan Hulandes pafo di Hulanda manera Aruba, Boneiro, Corsou y Colombia na unda cu comerciantenan Hulandes cu kier conecta cu esunnan na Colombia of Caribe Hulandes, y vice versa, por tuma contacto cu nan pa establece relacionnan comercial.
Den entrevista cu director di Holland House Colombia, Jan Willem Van Bokhoven e ta conta nos cu un bes pa aña ta trece tur miembro hunto pa presenta kico a logra den aña anterior. Un cos cu a keda subraya sigur ta con mas y mas compania for di Aruba ta bayendo Colombia pa expande nan relacion comercial.
“Nos tabata tin awe presentacion di resultadonan di 2023, y tur 419 miembro di Holland House Colombia.” E tabata un encuentro hopi dinamico segun Bokhoven, como Reino den relacion cu Colombia por a mira un aña hopi exitoso tras di lomba.
Tin crecemento den loke ta export for di Colombia pa Hulanda, cual tabata poco mas cu 2 mil miyon dollar, direccion di Aruba, Corsou y Sint Maarten ta papia di poco mas di 300 miyon dollar, un bon aña den loke ta relacionnan comercial y inversionnan. Aña pasa a conta cu alrededor di 60 miembro nobo, ta nifica cu awor nan ta hopi mas grandi cu 419 miembro den su totalidad anto algun di esakinan ta bini for di Aruba tambe. “Dus bo ta mira cu relacion entre Aruba y Colombia ta crece, mas compania di Aruba ta biniendo e banda aki. Den buskeda di negoshi y oportunidadnan nobo, y esaki tin Holland House hopi bon ocupa,” Bokhoven ta splica.
Holland House ta encarga su mes den loke ta inversionnan, relacionnan comercial y mas entre Aruba, Corsou, Sint Maarten y Hulanda, hunto cu Colombia y pa sigui reforsa esaki. Cual ta nifica cu un empresario for di Aruba cu lo kier bende algo na Colombia of hasta cumpra of inverti, ta aki ta unda Holland House ta cay aden pa asistencia. Riba un manera hopi practico, nan ta e partido cu ta percura pa haya e partners debido na Colombia, pa haya e clientenan of inversionistanan cu mester, nan ta diariamente trahando cu un team grandi pa yuda mas empresa cu ta posibel for di Aruba pa ta exitoso na Colombia.
“Esaki ta fortunadamente bayendo hopi bon e ultimo dos aña. Minister Wever tambe tabata di bishita aña pasa anto bo por ripara cu e impulso di esaki a causa un impacto grandi.” Jordan Schlipken-Croes, director di Area Latino Americano di Aruba Tourism Authority (ATA) a keda re-eligi den e asamblea como miembro di directiva di Holland House, cual ta haci Aruba permanentemente presente formando parti di e directiva aki. Esaki ta percura pa Aruba ta keda tambe den prioridad segun Bokhoven ta expresa. Holland House a conoce un crecemento di 55%, cu miembronan nobo manera menciona, y ta premira cu nan ta bay sigui crece mas ainda mirando cu e interes ta hopi grandi.
ATA TA MIEMBRO FUNDADO DI HOLLAND HOUSE
Aruba Tourism Authority (ATA) ta miembronan fundado di e Holland House, cual su obhetivo principal ta pa representa Reino Hulandes. “Nos ta wak fuerte esfuersonan den locual ta turismo pero tambe si nos por aporta den otro sectornan, nos ta semper dispuesto pa conecta cu e personanan corecto,” Jordan Schlipken-Croes ta splica. Primordialmente nan tin 419 miembro formando parti di e camara, consistiendo di companianan importante manera KLM, Heineken, y varios compania di Aruba. “Nos ta sinti nos ta den e target corecto pa ta den contacto cu e personanan aki.”
E proceso no ta nada dificil, simplemente tin mas compania di Aruba y diferente otro isla cu interes. Bo ta cuminsa na tuma contacto cu Holland House directamente, sea ta un idea – no mester ta un compania estableci, pero un idea cu por tin unda por wak Colombia por tin potencial pa trece producto na Aruba. Holland House simplemente ta guia bo y mustra bo kico bo tin cu haci na Colombia pa logra hiba e producto of servicio. Actualmente e tendencia ta cu mayoria compania di Colombia tin hopi interes den hiba producto na Aruba, pero tambe tin Rubiano cu tin conocemento di tecnologia of software y servicio mas cu tur cos. Esey ta loke actuamente ta biniendo for di Aruba.
