Corte di Husticia di Surnam a rechasa diaranson e recurso di e apelacion pa suspende e condenanan di e ex-presidente profugo Desi Bouterse y e otro cuater sentencianan pa e asesinato di diescinco opositor politico na 1982.
E abogadonan di e ex-mandatario a alega cu e proceso hudicial contra su clientenan no tabata husto, y esey ta loke Corte di Husticia mester a determina diaranson, cu a declara “inadmisibel.”
Asina ey e ex-gobernante mester cumpli cu su condena di binti aña di prizon, emiti na december ultimo, ya cu e corte a dicidi di no suspende e sentencia ni su ehecucion.
No obstante, un di e abogadonan, Murwin Dubois, cita p’e medionan Surnameño, a indica cu nan ta bay “studia cuidadosamente e consideracionnan di corte” pa determina ki otro paso lo tuma. Dubois a bisa cu e team huridico ainda ta kere cu a comete eror di proceso den e huicio.
Aunke e opcionnan legal pa Bouterse y e otro cuater presonan –sentencia na diescinco aña di prizon- pa evita e castigo a pasa, e pregunta cu ta keda bin dilanti ta si e ex-presidente lo cumpli cu e condena ey.
Bouterse, di 78 aña y presidente entre 2010 y 2020, ta scondi p’e autoridadnan di Surnam desde januari ultimo, ora e mester a presenta n’e autoridadnan, y su paradero ta desconoci.