Situacion cu mundo ta pasando aden , ta exigi pa nos biba awor mas cu nunca un bida,di oracion y confiansa den nos Señor , pasobra ta asina solamente nos por sali pa dilanti.
Mundo ta parce masha bruha, pero e agenda di Dios si ta keda mesun cos.
Locual mundo ta yama cambio climatico, ta duna nos señal di Cristo su binida.( Mateo 24/ Mateo capitulo 24).
P’esey ora dolor di parto aumenta, tur hende sa cu e Yiu ta na caminda.
Asina ta cu den Lucas 21:33 (Lucas capitulo 21 versiculo 33) ..”y Hesus ta bisa :Cielo y tera lo pasa ma Mi palabra nan lo no pasa”.
Y Hesus a duna 3 advertencia cual ta hopi importante pa como mayor nos tene cuenta cu ne den nos hogar.
Den Lucas 21:34-35 (Lucas capitulo 21 versiculo 34+35) Hesus ta bisa: Tene cuidao pa boso curason, no ta carga pa causa di paranda, y buracheria, y preocupacion nan di bida y e dia ey no bini riba boso manera un trampa , pasobra e lo bini riba tur esunnan cu ta biba riba superficie di mundo.
Wak bon kico Hesus ta bisa y mira con e ta tumando luga diariamente, hende ta parandia tur dia, y no tin un dia cu no tin buracheria, y accidente di auto,y violencia pa causa di paranda y buracheria. Preocupacion di bida ta na moda , awor e nomber ta “Depresion” y den dje tin hopi capricho cu hende ta pone pa cumpli cu ne cu no ta boluntad di Dios.
Hasta awor nos a drenta un tempo cu rebeldia contra e Palabra Dios y ta legalisa libertinahe, pa asina hende por haya nan deseo.
Pero un cos hopi hende no ta corda cu ora mundo aproba leynan contra e palabra di Dios, nos ta aparta hende su curason for di Dios, y tur esaki lo aporta na e gran Apostacia di cual 2Tesalonisensenan 2:3 (2Tesalonisensenan capitulo 2 versiculo 3 ta papia di dje,
Si como mayor nos ta permiti nos yiunan haci tur locual, cu nan kier, uza droga, bebe, paranda constante y otro tipo di bagamunderia,nos mes ta aparta nos yiunan for di Dios , cu tur consecuencia doloroso cu por bini pa nos.
Den Lucas 21:36 (Lucas capitulo 21 versiculo 36) e palabra di Dios ta bisa: Ma sea alerta tur ora bay , haciendo oracion pa boso por tin forsa pa scapa di tur e cosnan aki cu ta bay tuma lugar, y para dilanti e Yiu di hende .
Hesus ta avisa pa nos ta alerta: Pasobra lo bini hopi cambio, cu no ta cumbini abo como mayor y bo cas, tene cuenta bon kico bo scucha , lesa y mira den bo cas , pasobra enseñansa dañino ta aparece tur dia, pero e palabra di Dios ta bisa nos cla, cu haciendo oracion nos lo por scapa for di e cos nan aki nos lo ta cla pa encontra cu nos Señor Hesus Cristo na su binida.
E dia y e ora ningun hende nos sa , p’esey nos mester prepara den Fe y oracion.
