Na Gabinete di Gobernador di Aruba, riba dialuna 20 di september 2021 durante oranan di mainta a tuma luga e firmamento di e decretonan nacional, esta landsbesluitnan, di retiro di e ministernan cu ta renuncia y e landsbesluitnan di nombramento di e ministernan nobo cu ta asumi nan puesto. Esaki a tuma luga door di Gobernador Interino di Aruba, Su Excelencia Yvonne Laclé-Dirksz, y e minister-president saliente y entrante, Evelyna Wever-Croes.
Decretonan nacional retiro ministernan den funcion
Primeramente Gobernador Interino a firma e decretonan di retiro di e ministernan demisionario. Na su turno, Evelyn Wever-Croes tambe a firma e landsbesluitnan den su funcion como minister-president saliente.
Decretonan nacional retiro y nombramento minister-president
Seguidamente Gobernador Interino a firma e landsbesluit tocante tanto retiro di e Minister president saliente como tambe nombramento di e proximo Minister President. Mirando cu ta trata di e mesun persona, Evelyn Wever-Croes tambe a firma e landsbesluit aki dos biaha: prome den su funcion como Minister president saliente y despues den su funcion como proximo
Minister president.
Decretonan nacional nombramento ministernan nobo
Finalmente Gobernador Interino a firma e landsbesluitnan di nombramento di e ministernan nobo. Na su turno, Evelyn Wever-Croes den su funcion di proximo Minister president, tambe a firma e landsbesluitnan aki.
Huramentacion
Minister president y e otro ministernan di Gabinete Wever-Croes II lo huramenta awe dialuna 20 di september pa 5:30 or di atardi na Cas Ceremonial di Gobernador den presencia di Gobernador Interino di Aruba, Su Excelencia Yvonne Laclé-Dirksz.
Minister plenipotenciario
E gabinete nobo Wever-Croes lo tuma un decision pa loke ta trata e puesto di minister plenipotenciario.
