Diabierna mainta maestronan di Emma School a reuni cu sindicato SIMAR y e decision a cay cu no ta acepta mas e decisionnan unilateral, sin dialogo, cu minister di Enseñansa ta tuma sin pensa riba e consecuencianan.
Den e reunion tambe tabata presente e Secretario General di SEPPA Magaly Brito.
E reunion di un dia prome no tabata un dialogo, pero a informa di e decisionnan tuma den forma unilateral. Pero maestronan ta bisa cu nan t’ey pa sigura derecho di e studiantenan y cu nan ta haya un enseñansa di calidad. A scucha di e decision di “fuseer” scol, pero pa sorpresa a constata cu no tin nada poni riba papel, ni e fasenan den cual ta bay ehecuta su plan.
A scucha tambe cu e scol no ta bay tin cabesante mas. Aki e mandatario no a sigui ningun articulonan den ley cu ta splica bon cla, kende por bira un cabesante y con e procedura pa yega ey ta. Mas ainda ora cu ta papia di enseñansa special. Ta papia di uzo di Management Team, cu no ta regla den ley.
No a prueba tambe con e cantidad di alumnonan pa enseñansa special a baha. Pero atrobe, nan ta bisa, si no ta haci test ta logico cu no tin mas mucha cu mester haya enseñansa special. Pero tampoco a papia di e transporte di e studiantenan cu ta bini di rond Aruba.
Nan kier claridad riba Reina Beatrix School; Scol Paso pa Futuro y Emma School.
Na final a dicidi cu no ta acepta e decision di e mandatario y lo bay anuncia pronto cual ta nan siguiente paso. “Ta basta!” Esaki tabata e ultimo mensahe di e maestronan.
