Diasabra mainta Camara di Comercio a tene su “Business Plaza: Step Forward” cu a resulta tabata hopi exitoso, segun e Presidente nobo di e entidad, Kawish Misier. E sala tabata yen di entrepreneur, negoshinan chikito y mediano. Ta yuda otro cu e presentacion pa por “step forward” y hiba negoshinan di Aruba pa e siguiente nivel.
Kawish Misier ta hopi contento cu e presentacionnan cu nan a haya di Cede Aruba, Aruba Bank, Camara di Comercio mes y mucho mas. E feedback cu a haya tabata tremendo. Tur esnan presente a inspira. Nan a conoce hende y ideanan nobo.
A bisa Misier cu nan lo incorpora esey den nan negoshi for di awo. Tambe e parti di Corporate Social Responsability, cual ta un parti hopi importante pa ta social. No tur ora tur cos ta placa y ganashi. Tin cu traha riba e comunidad pero na un manera holistico y e Corporate Social Responsability ta algo hopi importante. Cu e añanan p’adilanti lo e keda bira mas importante ainda.
Nos ta den un economia un tiki fragil. Den Caribe por mira cu na 2017, tabata tin un horcan y otro hotelnan na otro pais a cera y e turistanan a bin Aruba y esey tabata bon. Pero awo e hotelnan na e otro islanan, lo bay habri bek y lo habri bek cu prijsnan abao.
Ta pesey e negoshinan cu ta bin nobo mester ta conciente di esey. Conseho cu ta duna ta, cu nan mester haci un hopi bon market research. Haci entrevita cu bo potential buyers. Wak kico nan kier. Kico nan mester y for di eynan ta haci e research cu bo supplies, y business developers, pa crea y trece producto y servicionan cu mercado ta pidi pe.
Misier a splica cu loke Aruba tin mester, vooral pa sector priva, mester union. Union ta haci forsa. Tin hopi hende na Aruba cu tin bon idea, tin bon iniciativa, pero djis door di networking, bin hunto, comparti ideanan, por logra hopi mas. Tin cu wak over di e horizonte. Mundo ta cambiando. Tin un globalisacion, tin digitalisacion y e mundo dies aña pasa no tabata con e ta awe.
Dies aña pasa, Aruba no tabata tin smartphones. Awendia tur hende tin’e. Aki dies aña nos tin cu puntra nos mes con mundo lo ta, pa nos bay riba dje. Tin cu bay den un manera cu union y den un direccion como pais. Eynan nos ta yega mas lihe, mas leu.
