Un caso cataloga como un caso grandi y di miyones di florin, enrealidad ta un caso cu a laga un sabor amargo den varios hogar riba nos isla. Un caso na unda awe inhustamente famianan ta trauma cu dañonan irreparable.
Mientras cu Ministerio Publico ta acusa ex-Minister Paul Croes di, abuso di poder, tuma 10 caha di cerbes y sumanan di donation na su fundacion politico, a cambio di permisonan di trabou , den sala di corte e realidad di bida ta diferente pa mayoria acusado.
Caso L.O. Tierras Colombianas
Den e siman tras di lomba Ministerio Publico e haya e oportunidad pa trece nan puntonan dilanti den nan requisitoir pa e caso IBIS. Durante e tratamento di e caso acusadonan por a hiba palabra y duna di conoce nan banda di medaya. Loke a resalta di un di acusadonan , sr. L.O di Tierras Colombianas ta cu e persona aki, di un edad ya caba avansa, cu un enfermedad grave a ser yama pa presenta na corte. Esaki en prinicipio no ta nada particular como cu L.O. ta un sospechoso den e caso.
Loke cu si ta remarcable ta cu ta trata aki di 1 caha di cerbes y 1 weya di sopi. Bisando esaki ta di cuestiona con ta posibel cu un persona mester presenta den pampers pa defende su mes den un caso cu na principio a ser tilda di ta un di e casonan mas grandi cu pais Aruba a conoce mientras, cu en realidad unico cos cu Ministerio Publico por a acusa sr. L.O di dje ta di a trata di cumpra ex-Minister cu un caha di cerbes y un weya di sopi pa un actividad politico. Na dado momento, Juez su instincto humano a dicidi di trata e caso aki prome, pa asina sr. L.O por bandona sala pa motibo di salud. Banda di esaki ta importante pa menciona cu loke sr. L.O. ta keda acusa di dje te na e momentonan aki ta, pa colmo, basa riba speculacion
Caso J.W.
Un otro caso cu a hala nos atencion mirando e embergadura cu Ministerio Publico a presenta e caso na pueblo, ta di sospechoso J.W di un compania den Citgo. Durante tratamento di su caso, e la declara di no ta reconoce su mes den acusacionnan di Ministerio Publico como cu den su opinion, na ningun momento e la purba di soborna ex-Minister Croes. Esaki sr. J.W. a nenga rotundamente.
Na final di e tratamento di caso, juez a puntra J.W. pa su circunstancianan personal y aki ta unda cu sr. J.W. ya no por a contente su emocionnan pa cu e caso traumatisante aki. Mescos cu hopi di e otro acusadonan, cu lagrima na wowo sr. J.W. a pidi juez pa porfabor bandona sala. Na nos redaccion ta conoci situacion personal y familiar di sr. J.W.
Loke cu ta sumamente remarkable ta cu na momento cu juez a puntra cada un di e sospechosonan den e caso nan declaracion riba nan circunstancianan personal, esaki tabata uno sumamente emocional. Declaracionnan di trauma y cu acusadonan ta considera inhumano desde Ministerio Publico a drenta cas y invadi nan privacidad. Yiunan traumatisa, personanan na man di psycologo y hasta cu a costa bida den famia. E ora, enberdad e gran pregunta lo mester ta: unda e abuso di poder cu ta keda menciona den e caso aki enrealidad ta sinta.
