Siman pasa a tuma luga e campeonato Mundial na Guadalajara, Mexico. Aruba tabata tin dos participante y un coach cu a participa. Presidente di Aruba Taekwondo Bond (ARTBO), Moises Fernandez, a atende varios reunion na Mexico y mester a vota. Monica Pimentel a coach e rumannan Klaber y a atende e reunion di coach pa haya sa tur e reglamentonan nobo di coach den e campeonato mundial.
Jourdé Klaber a bringa su prome mundial den e categoria di adulto y a topa cu Muhammad Bassam Raihan di Indonesia, cu a gana e pelea 2-0. Joshua Klaber a subi na e nivel di adulto y a bringa su prome Mundial. Joshua Klaber a topa cu Samirkhon Ababakirov di Kazakstan cu a gana 2-0.
Monica Pimentel coach di Aruba ta contento cu e presentacion di e rumannan Klaber y a pone e mundial tras di lomba y awo ta preparando pa e proximo campeonato internacional. Monica Pimentel a bisa si cu “we wil be back stronger than ever.”
E rumannan Klaber y coach Monica Pimentel a topa cu Nicole Hoevertsz, secretario di Comite Olimpico Arubano (COA) na Panama. Y hunto nan a biaha den avion pa Aruba. Moises Fernandez ta gradici Monica Pimentel pa e bon trabou cu e ta haciendo cu e rumannan Klaber y awo e trabou ta sigui.
