Amsterdam Manor un biaha mas a sali victorioso den su bishita na Corte cu un caso contra Gobierno di Aruba. Nan a haci un serie di demanda y a bay di acuerdo cu tur, cu excepcion di algun punto chikito. Echo ta cu e decision aki ta mustra cu aunke ta bay traspasa tur e instalacionnan di RWZI pa e compania nobo, Aruba Water Sustainable Solutions N.V. (AWSS), mientrastanto gobierno ta keda responsabel. Mas pasobra cu na inicio AWSS no tin e recursonan pa cumpli.
E punto mas importante den esaki ta cu gobierno mester huur un RWZI mobil pa yega na e capacidad minimo di por procesa 12.000 m3 di awa di riool pa dia. Y e ta serio pasobra, si no cumpli mester paga un boet igual na e suma cu huurmento di un mobil pa procesa 8.000 m3 ta, esta 450 mil florin.
Resumen di e sentencia ta cu gobierno mester tuma casi tur e medidanan pidi pa percura cu e planta di RWZI na Bubali ta funciona sin causa molester di musca y holo stinki. Y incluso no a prohibi gobierno di conecta mas camber di hotel riba e planta bieu aki. Pero, mester percura cu tin un planta, incluyendo e mobil(nan) pa procesa e awa, basa riba e capacidad necesario.
“Gobierno mester sa ki efecto cada camber nobo tin riba e planta y cuanto capacidad extra e mester tin pa evita otro medidanan. Sea nan ta rechasa e peticion di permiso of cu esun cu a pidi e permiso mester percura pa procesa su mesun awa sushi, of aumenta e capacidad disponibel na RWZI.” Eskai ta para den e sentencia.
E caso aki no ta e prome procedura entre partidonan y den un di e ultimo decisionnan ta menciona cu pa añanan largo gobierno ta actuando inhusto pa cu Amsterdam Manor, door di sigui laga e instalacion di purificacion di awa funciona di un forma deficiente. Ademas di compensacion financiero a bisa cu gobierno ta obliga pa tuma medidanan concreto pa limita e molester.
Den e ultimo caso, Amsterdam Manor a pidi pa cumpli cu tur e otro decisionnan y a haci algun demanda adicional. Den corte gobierno a bisa cu e sistema ta asina bieu cu cada rato tin algo ta kibra y cu ta motibo cu gobierno no por a cumpli cu tur e sentencianan y tuma medida ta costa asina hopi placa. Pero corte a bisa cu nan mester tene cuenta cu tur e otro decisionnan tuma caba relaciona cu e RWZI y Amsterdam Manor. A constata cu desde 2002 gobierno no a haci suficiente na mantencion y tampoco a haci inversionnan structural den RWZI cu a causa cu e ta funciona malo.
Tambe hues a bisa cu gobierno mester a percura cu e capacidad di RWZI ta suficientemente grandi pa e fluho grandi di awa sushi cu ta bini cu construccion di hotelnan, condominium y vivienda. Awe gobierno ta haya su mes confronta cu e escogencia di maneho haci den pasado. Y nan mester carga e consecuencia y no por tira esaki riba Amsterdam Manor.
Ora cu gobierno ta duna e splicacion cu no a haci nada pasobra ta bay privatisa RWZI, ta lubida algo. Gobierno ta lubida cu a base di sentencianan anterior e ta obliga pa tuma medidanan pa limita e molester. Mientras cu gobierno ta responsabel pa RWZI, e mester hinca placa den maneho y operacion di RWZI.
