Un hurado a declara e narcotraficante Joaquin “El Chapo” Guzman culpabel di e 10 acusacionnan penal contra dje, asina Tyler Daniels, vocero di e Fiscal di Districto Oost di New York a informa.
Entre e cargonan cu tabata colga riba cabes di e lider di e cartel di Sinaloa tabata: participacion den un iniciativa criminal continuo, conspiracion internacional pa elabora y distribui cocaina, herina, metanfetamina y marihuana, conspiracion pa importa cocaina (pa Merca), conspiracion pa distribui cocaina, distribucion internacional di cocaina, uzo di arma di candela, conspiracion pa labamento di placa proveniente di narcotrafico.
Lo sentencia Guzman dia 25 di Juni. Awo e tin cu enfrenta cadena perpetua. Ainda no sa su sentencia, pero e veredicto di culpabilidad den e cargo di uno so, ta nifica cu e lo enfrenta un cadena perpetua obligatorio.
Hurado a delibera mas di 30 ora durante seis dia, despues di mas di 200 ora di testimonio di 56 testigo, entre cual Guzman no tabata tey presente, durante un huicio di mas of menos dos luna y mey na Brooklyn, New York.
Den e transcurso di dos luna y mey, un hurado di ocho hende muhe y cuater hende homber den e tribunal federal di Brooklyn, a scucha testimonio riba torturanan indecibel y asesinatonan espantoso, corupcion epico den casi tur nivel di e gobierno di Mexico, amantenan di narco y escapenan subteraneo sunu, armanan AK-47 di oro y monogramanan cu diamante poni den nan.
E caso di Ministerio Publico a presenta 200 ora di testimonio di 56 testigo. 14 di nan, den su mayoria admiti door di narcotraficante y asociadonan di e cartel, a coopera cu fiscalnan cu e speransa di reduci nan propio penanan di prizon.
E huradonan a evita e contacto visual cu “El Chapo” den Corte. Huradonan a mantene nan bista abao, sin mira Joaquin “El Chapo” Guzman Loera, mientras cu tabata lesa e veredicto.
Despues cu Hues Brian Cogan a lesa e veredicto di e hurado, a bisa nan cu e forma den cual e huradonan a comporta “ta enorguyecemi hopi di ta Mericano.” Prome cu e Hues of e miembronan di hurado a drenta den e sala, un miembro di e ekipo di defensa a acerca e esposa di Guzman, e reina di beyesa Emma Coronel, pa entreg’e un lenso, pero el a nenga.
Despues di e veredicto, CNN a puntr’e con el a sinti. El a bisa: “Bon, danki.”
