Riba invitacion di Judith Croes, Guia di Actividad na Cas di Cuido di Palisiaweg, Bradley Versprey, conoci tambe como Easy B tabata presente n’e celebracion di Dia di Obrero na Cas di Cuido na Palisiaweg, San Nicolas.
Easy B a presenta eynan riba invitacion di Judith Croes, guia di actividad, pa presencia y hunto cu nan celebra Dia di Obrero cantando su cancion ‘Together’. Easy B a bisa cu ta un sensacion unico, pa bin na un cas di cuido, unda cu tardi of trempan, nos tur lo yega na e edad ey, pa comparti amor y alegria. Y tambe desea nan un Feliz Dia di Obrero.
Mas aleu, Easy B a indica cu e ta gusta e ambiente cu e grandinan ta trece cu nan, con nan ta biba cu e cancionnan. Y ora cu nan invita mi ta pasobra cu nan gusta e canticanan hopi y cerca Aruba completo. “P’ami tabata un placer di tabata por a comparti, canta y baila hunto cu nan den conexion cu Dia di Obrero.
MENSAHE
Easy B a sigui bisa cu un dia nos tur tin cu bay. No ta importa bo raza, no ta importa bo color, no ta importa nada. No ta importa si bo ta soltero. “Un dia nos tin di bay y nos mester cuida di otro, pasobra esey ta demostra amor.”
Nos ta comparti amor, pasobra esaki ta e trabou cu nos ta haci, nos mester respeta otro y cuida di otro. Un dia nos mester bay y cuida di otro. Pasobra esey ta nan trabou, ta comparti union, pasobra esey ta e trabou cu e trahadonan di e casnan di cuido ta comparti, e union y e amor. Nos ta comparti union, un rolstoel, un bandera, un curason. Un sensacion hopi dushi.
Esey ta e mensahe pa pueblo di Aruba y pa mundo henter.
Bradley a conta cu el a keda sorprendi p’e acogida cu su cancion a ricibi, durante y despues di e paradanan. Tabata algo diferente pa Aruba, pa prome biaha a bin c’un groovy soca monarch y tabata un estilo nobo pa un y tur.
Por ultimo, el a desea e trahadonan un Feliz Dia di Obrero, hopi forsa pa sigui duna nos grandinan e miho cuido posibel.
