E status di e trahadonan di La Linda ta mas of menos mesun cos cu 3 pa 4 siman pasa, Segun abogado Hose Figaroa, e empleadonan ta den servicio ainda di La Linda, apesar cu nan no ta trahando.
Gerencia di La Linda a dicidi, cu entrante 1 di Januari nan a stop e operacion. Di loke a compronde, operacion no a stop 100%. Tin cierto bentanan cu ta tumando luga ainda, pero no cu e tienda ta habri normal. E grupo grandi di trahado ta na cas.
Tin di compronde cu tin un grupo chikito di trahado ta trahando. Figaroa mes ta representa 34 di e trahadonan cu ta varia entre trahadonan cu tin 1 pa 2 aña di servicio te cu trahadonan cu tin riba 45 aña di servicio. Edadnan tambe ta varia hopi. E situacion cu ta aden awor aki, lamentablemente ta cu nan ta sin salario. No a paga e salario di Januari.
E plan ta pa tuma accion legal contra di esey. Mientras tanto, entrante 1 di Februari, a haya sa for di prensa cu e doñonan di La Linda a pidi un surseance van betaling, cual ta un extension di pago, unda cu corte na e momento ey ta nombra un curator, kende hunto cu e compania ta purba di haci lo posibel pa paga e debenan cu tin habri.
E ta purba di of scapa un compania di bay bancarota of mustra cu no tin otro opcion y e compania mester bati bancarota.
Desde cu esey a sosode, Figaroa tabata tin combersacion den nomber di e clientenan cu e curator. A papia te cu dialuna ainda y ta purbando di busca un manera en todo caso pa e salarionan cu tin pendiente, pero tambe kico lo bay pasa den futuro, mirando cu e intension ta cu La Linda no lo habri mas.
Awor mester bay wak si e relacion di trabao mester wordo termina, con esaki tin cu wordo termina y con ta bay haci cu loke ta e pago di añanan di servicio cu tin pendiente, loke ta cesantia, e terminonan di pre aviso, etc.
A combersa cu e grupo di trahadonan dialuna mes, informa nan di kico ta loke ta pasando y ta pendiente awor aki. Tin algun reunion cu Departamento di labor cu tin cu tuma luga ainda hunto cu e curator pa mira kico ta e miho pasonan pa yega na un final di e situacion aki y tambe un final pa e trahadonan, en todo caso, por haya nan añanan di servicio paga.
Na momento cu tin un caso di surseance van betaling, SVB por bay over na paga cesantia. Segun ley esey ta un di e posibilidadnan mas pa bay over na paga cesantia, e relacion di trabao mester caba.
E relacion di trabao no ta wordo termina asina asina. Pa por termina e relacion di trabao, mester di un permiso di Departamento di labor y tin cu discuti con esaki lo cana.
Si e lo cana normal, of tin cu cana un proceso acelera. Tambe na momento di termina un relacion di trabao, no ta yega y caba cun’e na un momento pa otro, sino tin cierto tempo di pre aviso cu tin cu duna, cu ta varia di 1 te cu cuater luna.
Durante e tempo ey, e salario tambe mester keda core. Tur esey tin cu papia riba dje. Aunke cu ta papiando caba.
Tin combersacionnan cu a tuma luga caba cu e curator, pa asina por wak con ta e manera mas miho pa e trahadonan por sali di e situacion aki.
Motibo pakico esey a pasa, no ta totalmente cla. En todo caso, awor aki tin un curator cu lo mester bay tambe hunto cu gerencia purba di saca afo kico ta e motibonan. Ya en realidad, si tin sentido pa sigui mes, si e proximo paso ta bancarota. Pa loke ta e papel di e abogado di e trahadonan, pa proteha mas tanto posibel nan interes pa nan por sali mas beneficioso posibel di e situacion aki.
Segun abogado Figaroa, por imagina cu tempo e benta no tabata bay manera antes mas. Pero si tin otro factornan cu a hunga un rol, ta speculacion. No por indica exactamente kico a pasa. Loke cu sa ta, cu ultimo luna di aña pasa, gerencia a indica cu entrante 31 di December no kier sigui mas. Esey tabata e paso.
