A dun’e un oportunidad di trece un idea, un obra na e entrada di e pilar economico di nos pais, nos turismo. E obra “Speransa” ta traha di “stainless steel” y ta situa riba e rotonde na altura di Guardian Group riba L.G. Smith Boulevard, na final di Watty Vos Boulevard. E ta un manifestacion den forma di un obra di arte, pa mustra kico nos ta y ken nos ta. E ta locual ta diferencia Aruba di nos competidornan den Caribe y rond mundo, esta nos curason.
Speransa
Jani a dedica su obra pa inspira riba e curason, e bondad cu ta diferencia nos y e speransa. Nos hendenan no ta give up. Cos ta bira dificil, pero nos ta para bek. Tur esunnan cu para bek, no den e mesun forma pero esey ta e speransa cu nos tin, cu ta inspira nos pa sigui, a pesar di tur loke nos ta pensa cu ta bay malo. Tambe tin e movecion, nos cultura, e soca, musica folklorico, salsa, tur musica cu ta bin cu e cultura di esunnan cu ta bin Aruba.
E diseño
Nos tin un forma cu ta bay di chikito pa grandi. Un representacion di cuater elemento cu ta mustra sernan humano cu ta crece. Esey ta nifica e crecemento, e speransa cu ta bay tin crecemento economico y e speransa cu nos tin crecemento intelectual.
E obra tambe ta ilustra e trafico humano. Tin turismo, tin stagiaire, tin hende cu ta bin traha pa un periodo. E ta un trafico cu pa nos ta normal. E ta algo caracteristico pa nos. Den e obra bo ta mira e movecion di hende. Tambe tin e elemento di famia. Tur esey ta simbolisa e cultura. E tecnica ta celestial. Ta haci diferente combinacion. E figura cu ora cu cuminsa, a cuminsa mas rough. E escultura riba su mes ta hopi fine lines.
Pa Jani, ta un honor masha grandi pa por expresa e sentimentonan ey den un obra cu ta keda pa semper. E proyecto aki ta di e compania Mota Engil, e financiado, diseñado, constructor y esun cu lo mantene Watty Vos Boulevard pa e siguiente decadanan.
Tocante Jani Croes
Ing. Jani Croes sigur no ta un figura desconoci na Aruba. Fuera di ta un arkitecto, e ta tambe un locutor y un artista di arte plastico. El a studia pa arkitecto na State University of NewYork y a logra su diploma na 1983. El a traha 13 aña den e Architecten Bureau na DOW y despues a sigui riba su mes. E ta responsabel pa varios proyecto residencial y comercial. El a realisa trabounan den mayoria hotel riba nos isla.