Refineria Isla ta un empresa responsabel ku ta operá respetando leinan di Kòrsou. Lamentablemente nos ta opservá ku sifranan i datonan ta wòrdu trese den media na un manera eróneo, ku intenshon di krea e impreshon robes ku Refineria Isla ta violá e norma vigente pa kalidat di airu.
Esaki ta trese konfushon den nos komunidat i no ta aportá ku e proseso pa konhuntamente yega na solushonnan pa futuro.
Laga nos kuminsá pa aklará e parti di midishon di SO2 ku GGD Amsterdam ta hasi na e stashon di midishon di Gobièrnu na Beth Chaim. E resultado ku sali for di e midishon aki ta e kontribushon di emishon di SO2 total di tur kontribuyente, pues tur industria den Schottegat (Isla, CRU/BOO, Aqualectra, Diesel Power Plant, Asphalt Lake Recovery), barkunan i vehíkulonan.
Konsiderando ku e nivel spesífiko di kada emitor no por wòrdu midi separá, korte a dikta den su veredikto di 12 di yanüari 2010, ku ta a base di modelahe (AERMOD) esaki mester keda determiná. Esaki ta un práktika akseptá internashonal. Manera nos por a mira den diferente kaso den korte, a prueba pa aña 2009, 2013 i 2014 via di e institutonan independiente StAB i TNO, ku e impakto di Refineria Isla di SO2 riba suela ta bou di e norma máksimo di 80 µg/m3 anual.
Awor ku Isla tin un temporada ku mayoria di prosesonan for di operashon, ta argumentá ku e bahada di nivel di SO2 di e aña aki kompará ku aña pasa ta atribuibel solamente na Isla i ta un prueba ku e kontribushon di Isla ta mas haltu ku e norma máksimo. Pero esaki no ta kuadra ku realidat mirando ku otro industrianan den Schottegat tambe a hasi kambio i ta’tin un produkshon supstansialmente ménos durante e aña aki kual a pone ku nan kontribushon na SO2 tambe a baha drástikamente e último lunanan kompará ku aña pasá.
E mesun AERMOD modèl ku a kalkulá ku na 2017 kontribushon di Isla na e konsentrashon di SO2 na suela na Beth Chaim tabata 42 µg/m3, a kalkula un konsentrashon total di 34 µg/m3 pa luna di ougùstùs di 2018, ku ta kuadra ku e midishon di 30 µg/m3. Ku otro palabra e midishon nan di ougùstùs 2018 no ta kontradisí pero ta konfirmá e konklushonnan ku a saka den pasado tokante di e kontribushon di Isla.
Isla ta konsiente di su responsabilidat ku komunidat i ta sigui partisipá den e esfuersonan konhunto di e zona di industrial di Schottegat pa baha e emishonnan di SO2, pero informashon inkorekto no ta kontribuí na e solushon
