Awe, 22 di September ta haci un aña di eleccion di 2017. Despues di eleccion, ora pueblo a duna e veredicto, pueblo a pone 9 asiento den man di partido AVP, 9 asiento den man di partido MEP, 2 asiento den man di partido por y 1 asiento den man di partido RED. Partido AVP cu tabata e partido mas grandi, a dicidi cu e no kier carga e responsabilidad, cu e no kier forma gobierno. E ora a keda na MEP, e di dos mas grandi, pa mira si por forma un coalicion y e no tabata facil, asina Prome Minister Evelyn Wever-Croes a duna di conoce awe.
E lidernan politico di partido RED, Ricardo Croes, di partido POR, Otmar Oduber y Evelyn Wever-Croes di MEP a sinta cu otro. Nan no tabata hendenan cu conoce otro prome cu esaki, ni custuma cu otro. Sinembargo a dicidi riba loke ta dividi nan, pero enfoca riba loke ta uni nan. Y asina, despues di 2 luna di negociacion, a logra un convenio, un tipo di areglo, na kico lo bay bira e programa di gobernacion di Aruba.
Un biaha mas no a enfoca riba e diferencianan sino riba loke ta uni nan. Y loke ta uni nan ta e amor grandi pa Aruba.
“Si mira bek e ultimo aña aki, e no tabata facil. Ta un di e retonan increiblemente grandi. Cada dia tabata pasa y tabata bin cu otro sorpresanan riba mesa”. Sinembargo Prome Minister ta mira e ekipo di personanan den gobierno, den Parlamento, conhunto a para y a enfrenta cada reto y a percura pa di cada reto, haci un oportunidad.
“Na e momentonan aki, si mira bek, e lunanan mas pisa, ta tras di lomba. For di awo en adelante ta cosnan bon so lo bin y cu determinacion, cu fe y cu confiansa, lo trece e progreso y bienestar den henter nos comunidad”, asina Evelyn Wever a finalisa bisando.
