Diaranson Interpol a emiti un notificacion cora contra e ex-presidente di Surnam Desi Bouterse pa e forsanan di orden di henter mundo localisa y deten’e, tres luna despues cu el a huy despues di tabata sentencia na binti aña di prizon pa su participacion den e asesinato di diescinco opositor na 1982.
Bouterse ta profugo di e autoridadnan di Surnam desde december ultimo, ora tabata condena na dos decada den prizon pa e crimen menciona, cometi mas di cuarenta aña pasa.
E ex-presidente, di 78 aña, mester a presenta dilanti autoridad despues di e sentencia, pero no a haci esey y, desde e momento ey, su paradero ta desconoci.
Segun splicacion di Interpol riba su website, e notificacion cora ta un solicitud dirigi na e forsanan di orden di henter mundo pa localisa y detene provisionalmente un persona den espera di su extradicion of entrega, of di un accion hudicial similar. No ta un orden di detencion internacional.
E website ta inclui un potret di Bouterse cu su caracteristicanan fisico y a indica e cargonan cu tin su contra: “Participacion den e comision pa comete asesinato.”
Interpol a indica, ademas, cu e ex-presidente ta busca na peticion di e autoridadnan di Surnam.
Bouterse, cu tabata na cabes di un gobierno militar den decada di 1980 y tabata presidente entre 2010 y 2020, na 2021 tabata condena caba na binti aña di prizon p’e Corte Marcial di Surnam, cu a confirma un fayo similar di 2019.
E opositornan tabataq deteni dia 7 y 8 di december 1982 y hiba n’e cuartel general di e tempo ey di Ehercito Nacional di Surnam, unda tabata tortura y ehecuta. Entre e victimanan tabatin periodista, militar, lider sindical, abogado, empresario y profesor universitario.
Bouterse y su abogadonan a denuncia cu e huicio tabata “politisa” y cu e proceso no tabata husto, di cual a pidi pa suspende e sentencia. Corte di Husticia di Surnam lo dicidi dia 20 di maart proximo si Bouterse a enfrenta un huicio husto.
