E reunion di diahuebs mainta entre e gremio sindical (cu tin miembro den sector gubernamental) no tabatin un resultado concreto. E tabata mas bien un encuentro pa intercambia di informacion.
Loke si a probecha pa bisa den e reunion aki, segun Edward Maduro di SADA, ta cu e miembronan no kier menos cu 14.7% di indexering. Pues nada di e 7.7% cu gobierno a ofrece. “E tabata mas bien un reunion pa intercambia informacion y splica nos posicion,” Maduro a bisa na su salida.
A splica gobierno pakico e miembronan a rechasa e proposicion y a splica tambe con a yega na e proposicion di 14.7% pa e indexering di nan entrada. “Nos ta den fase di intercambio ainda pa cual no tin mucho di bisa. Rumornan semper lo tin. E punto cardinal ta cu nos ta trece e pensamentonan di miembro na gobierno. Pronto lo sigui delibera.”
E porcentahe cu sindicatonan ta pidi, segun Maduro, ta un tiki pa loke nan a perde den e forsa di poder di compra den e ultimo añanan.
Gobierno ta bay bek den seno riba e exigencia di sindicatonan y yega na un punto di bista. “Ora nan ta cla lo yama nos pa otro reunion.” Esaki ta indica cu no tin un fecha definitivo. Cual ta e siguiente paso, si no bay di acuerdo cu nan, e sindicalista no por a bisa. E ta haya cu ta mucho trempan pa pensa riba e punto ey caba. Pero a enfatisa cu tur cos ta keda den man di e miembronan di kico mester haci.
