Den un sala completamente yen a tuma luga e simposio organisa dor di Fundacion Mito Croes den cooperacion cu partido AVP. Un di e puntonan di accion di Fundacion Mito Croes ta por medio di estudionan y/of seminario, contribui na un perspectiva nobo pa un vision macro-economico duradero pa Aruba.
Loke a resalta e anochi di e simposio, ta e interes grandi cu tin de nos comunidad pa scucha perspectivanan nobo pa un cooperacion strategico entre Aruba y Hulanda. Obviamente e relacion entre Aruba cu Hulanda ta uno hopi importante pa pueblo y un parti grandi di Aruba kier wak iniciativanan nobo y constructivo den esaki.
Jan Ebbing, ex- director di TNO-Caribe na Aruba tabata e orador principal di e simposio. Ela refleha ariba e rol cu TNO na Aruba tabata tin den e periodo 2011-2017 y e rol cu institutonan manera esaki por tin den futuro. Entre otro el a mustra riba e crecemento rapido di e actividadnan economico di TNO na Aruba y den region, den apenas 6 aña.
Locual tambe a sobresali ta e importancia di e bon cooperacion cu Aruba tabata tin cu partnernan strategico den Reino y e oportunidadnan cu Aruba a perde cu e salida di TNO for di Aruba desde 2018, riba e tereno di sostenibilidad y energia alternativo. Solucionnan concreto pa e retonan cu Aruba ta enfrenta actualmente manera e problemanan na RWZI y Dump, lo por tabata mas avansa cu envolvimento di un instituto tecnologico renombra manera TNO.
Di otro banda a demostra cu Aruba por tin un balor strategico den Reino cu presencia di institutonan y empresanan manera TNO, Philips, Rietveld Academie y otronan na Aruba. Durante gabinete Mike Eman I y II a logra atrae companianan y institutonan Hulandes di renombre mundial manera TNO, Rietveld Academie, Scheepvaartschool Rotterdam, Philips y Gas Unie, cu tabata forma parti di nos economia y a cuminsa crea un sector nobo di nos economia.
Uno di exportacion di servicio, conocemento y experticio tecnologico y educativo, anto cu nos propio yiunan di tera. John Hart, presidente di Fundacion Mito Croes a bisa over di esaki: “Mester percura pa Aruba por tin un balor agrega den su relacionnan den Reino atrobe. No mester perde e ambicion pa tin un meta strategico como isla chikito den Reino”. Fundacion Mito Croes ta honra pa por tin den Jan Ebbing, un persona mas cu lo forma parti di un “klankbord” pa contribui na e formulacion di un plan nobo pa e area di sostenibilidad pa Aruba.
Durante di e simposio e orador y miembro di Fundacion Mito Croes, Aad Jan de Gruijl, a elabora ariba e oportunidadnan den e area di negoshi on-line cu FinTech. Aad Jan Gruijl a bisa entre otro: “Pa falta di un regimen financiero tecnologico moderno y habri, Aruba ta perde oportunidad pa participa den un economia global”. Fundacion Mito Croes ta trahando ariba un ‘position paper’ riba e area aki cu lo inclui FinTech como parti di un vision economico pa Aruba, unda cu transaccionnan di banco internacional ta bai hopi mas facil y barata di loke e ta actualmente.
Na final di e programa, a elabora ariba e importancia di un cooperacion strategico entre Aruba y Hulanda y a elogia e creatividad y iniciativanan cu hobennan den nos comunidad y den partido AVP ta tuma riba terenonan nobo pa nos pais.
Un otro tema cu a elabora riba dje e anochi aki tabata riba dje ta e proposicion di partido AVP pa converti e debe di Covid cu Aruba tin cu Hulanda den un fondo di inversion. Partido AVP tin e meta pa converti e debe di 900 miyon florin cu a fia for di Hulanda durante di Covid, den un fondo di inversion na beneficio di Aruba. Pa por logra esaki Aruba mester haci diferente cos den forma convincente. Entre otro mester fortifica e relacion cu Hulanda cu partnernan strategico na Hulanda. Asina ta duna mas contenido concreto y perspectiva di beneficio mutuo na ambos partner den Reino.
Fundacion Mito Croes ta extende palabra di gratitud na tur cu a atende e simposio y haci esaki uno exitoso y comienso di un desaroyo nobo pa Aruba. Por keda pendiente pa e siguiente simposio di Fundacion Mito Croes cu ta keda traha na renobacion di perspectivanan di desaroyo positivo pa Aruba.
