Conseho di Minister di Reino Hulandes a dicidi awe mainta durante nan reunion cu nan ta bay di acuerdo cu e proposicion di CAft pa fia Aruba e suma di 42.8 miyon florin. Esaki ta bay den un fiansa sin interes y cu mester paga bek aki dos aña. Riba e resto di 1.3 biyon cu Aruba a pidi, nan lo kier papia mas pa repasa e esfuersonan di Gobierno pa baha su mesun gastonan y maneha su entradanan miho.
E fiansa cu a propone awo ta pa asuntonan urgente den e presupuesto coriente di Gobierno. E ta encera 22 miyon e luna di april y un otro 20 miyon mas o menos pa mita luna di mei. Pues e suma di 42.8 miyon ta cubri gastonan operacional di 6 siman so.
Teniendo na cuenta e gastonan aproba den e fiansa aki, mester bisa cu esaki no ta inclui otro gastonan nobo, manera FASE den cual mas cu 8 mil ciudadano ta spera di haya 950 florin di Gobierno pa cubri nan gastonan, debi cu nan a perde nan trabou of perde nan salario debi na Coronavirus. Riba esey Gobierno tin algo menos cu 3 siman pa purba yega na e suma aki pa cubri e ayudo social aki.
Minister Raymond Knops a bisa den su conferencia di prensa di ta yudando Aruba caba, por ehempel cu “Medische aparatuur” y cu personal medico. Tambe a acorda cu Defensa lo brinda sosten na momento cu Gobierno di Aruba haci e peticion.
Pero over di placa si nos mester reuni un poco mas, asina e mandatario a aclaria. Tur isla ta den necesidad financiero, pero esey tabata prome cu Coronavirus caba. E berdad ta cu ningun di e islanan, pues ni Aruba, ni Corsou y tampoco Sint Maarten tin su Finansa Publico na ordo. E Minister Hulandes ta haya cu awor ta momento pa corigi e forma di traha aki y pensa mas riba “traha dam warda awa”, pa como pais por wanta e tipo di shocknan asina den Bo economia.
E mandatario a laga tur hende compronde mesora cu e fiansanan di duracion largo lo no bin sin un lista di condicion. El a adelanta caba cu lo mester tuma decisionnan politicamente doloroso, pero no tin otro forma awo. Ta tur hende mester hala faha mara den e momentonan manera esaki.
Conseho di Minister di Reino Hulandes a aproba awe un fiansa di 117 miyon florin pa Corsou; Un suma di 42,8 miyon florin pa Aruba y no menos di 50,2 miyon florin pa Sint Maarten.
Na final, riba pregunta di 24ora.com mes, Minister Raymond Knops a sigura e pueblo di Aruba cu “Nos ta hunto den esaki y hunto nos lo sali for di dje. Nos lo yuda e islanan. Pero e lockdown cu tin awo, pa con fastioso e ta, nos no por kit’e pasobra mester combate virus aki”.