Un rato pasa Gobierno di Aruba a anuncia un otro aumento den casonan confirma di Coronavirus. Di 77 caso cu a raporta ayera merdia, awe e cantidad a subi te na 82 caso confirma. Te cu awo a test 1008 persona, di cual 926 tabata negativo, 82 ta positivo, 20 a recupera, tin 302 den cuarentena, pues na tur nos tin 62 caso activo riba Aruba awe.
Di e cifranan presenta, por nota cu mas hende ta recuperando completamente di e virus aki. E cifra ey awor ta aumentando mas lihe y cu cantidadnan mas grandi cu esun di casonan confirma. Di 2 el a bay 14 y ya awe el a yega 20 caba. Por spera mas crecemento den e dianan nos dilanti debi cu mayoria pashent ta cura di e virus den dos pa tres siman di tempo, dependiendo con e curpa ta want’e.
Gobierno a anuncia cu desde awe nochi 9:00pm ta cuminsa TDQ y mañan diabierna henter dia lo tin un Shelter in Place mas estricto, incluyendo tur supermercado cera, pa evita movecion innecesario riba nos isla. A pidi tur hende pa keda cas riba diabierna, diadomingo y dialuna venidero.
