Tur sector cu no ta esencial ta paralisa na e momentonan aki cu Aruba tin Shelter In Place na vigor. Esaki ta inclui e sector di construccion. WAB a tuma decision pa freeze CAO-nan.
E organisacion di doñonan di trabou di mundo di construccion, esta Werkgeversvereniging Arubaanse Bouwnijverheid (WAB) a manda un carta pa Presidente di Sindicato di Trahadonan di Aruba (STA), esta Diego de Cuba. Un copia di e carta a bay tambe pa Mediador di Gobierno Anselmo Pontilius.
Den e carta e organisacion ta señala medidanan cu Gobierno a tuma relaciona cu e situacion di salud publico a causa di presencia di COVID-19 na Aruba. Ta mustra cu e situacion no ta facil pa nan sector cu tambe a keda paralisa y no tin trabou ni entrada. Cada empresa lo mester “deal” nan asuntonan internamente.
Sinembargo tin algun punto cu conhuntamente nan ta para banda di otro. Pa cuminsa e situacion ta haci cu mester freeze e CAO di e sector. Pa loke ta e bonus sea ta freeze, wanta of baha esaki, mientras cu e aumento entrante prome di april tambe ta para.
Otro decision tuma ta cu ta bay pospone pago di primanan di pensioen, paga di salario ta compensa cu dianan di vakantie cu mester tuma.
E organisacion ta bisa tambe cu si e medidanan di Gobierno bay mas leu cu 19 di april awo, e miembronan di WAB ta haya nan mes obliga di tuma medidanan adicional manera: pago parcial so di salario; lo por bini cu areglo di “no work no pay” ; por reduci orarionan di trabou; y por registra e empleadonan na e Fase Helpdesk.
Na final a expresa di ta dispuesto, si mester di mas splica, pa papia riba esaki via di un videocall.
