For di Federacion Panamericano de Levantamiento de Pesas, Aruba Amateur Weightlifting Association a ricibi un invitacion pa Sr. Hugo Themen participa na e Congreso Panamericano Extra Ordinario y alaves asisti como referee den e XXVIII Campeonato Panamericano de Mayores de Levantamiento de Pesas cu tabata clasificatorio pa e Weganan Olimpico di Tokio 2020. Esaki a tuma lugar na Guatemala for di 21 pa 28 april 2019.
Tabata tin participacion di 28 pais di region Panamericano den e Congreso Ordinario. Presente. Tambe presente den e Congreso tabata tin dos miembro di International Weightlifting Federation cu ta Director General Sr. Attila Adamfi di Hungria y Vice Presidente Sr. Nico Vlad di Romania.
Presidente di e Federacion Panamericano de Levantamiento de Pesas Sr. Lic. William Ozuna a habri e Congreso y a duna palabra di bon bini na tur e paisnan presente y tambe un relato estadistico con e deporte di weightlifting a sa di grese den region Panamericano y otro temanan. Sigi pa Sr. Lic. Cristian Hartey cu a pasa riba e Relato Financiero 2018 di e federacion cu a wordo aproba pa su miembronan y despues a sigi cu presentacionan di Sr. Attila Adamfi Director di IWF y Sr. Nico Vlad Vice Presidente cu temanan hopi interesante pa paisnan Panamericano.
Despues a jega turno pa eleccion di e dos puesto cu ta Secretario General y Vocal cu a keda habri di e Federacion Panamericano de Levanta miento de Pesas. Como ganador pa e puesto di Secretario General a keda eligi Sr. Enrique Montero Presidente di Federaciona Nacional di Brasil y como Vocal a wordo eligi Sr. Luis Seijas Presidente di Federacion Nacional di Venezuela.
Den e competencia tabata tin participacion di 30 referee na undo Hugo Themen a forma parti di esaki y como atleta tabata tin un total di mas di 280 atleta femenino y masculino di continente Panamericano. Varios recordnan a wordo kibra den categoria di femenino y masculino riba nivel Mundial y Panamericano.
Aruba Amateur Weightlifting Association kier a gradici Stichting Sportsubsidie Aruba y Lotto pa Deporte cu a cubri e gasto di biahe y palabra di pabien na Sr. Hugo Themen cu a participa den e Congreso Ordinario y fungi como referee internacional den e Campeonato Panamericano de Mayores de Levantamiento de Pesas cu tabata Clasificatorio pa Tokio 2020.
