E compania 111Repair, cu ta duna servicio den e industria aeronautica y cu e situa na Homestead, Florida (Merca) a solicita e accion hudicial.
Corte Comun di Husticia di Aruba, Corsou, St. Maarten y Boneiro, St. Eustatius y Saba a confirma cu a pone beslag temporalmente riba un avion Boeing 737-500, cu ta pertenece n’e empresa Venezolano Alianza Glancelot C.A. miho conoci como Albatros Airlines.
Segun un publicacion den Cronicas del Caribe, e avion tabata duna servicio comercial desde Estado Falcon pa Corsou y unabes el a yega Corsou, e autoridadnan Curasoleño a pone beslag riba dje.
Hues Solange Christiaan a ratifica e legalidad di e medida tuma contra di e avion di e empresa Venezolano.
E compania 111Repair, cu ta duna servicio den e industria aeronautica y ta situa na Homestead, Florida (Merca) a solicita e accion hudicial.
Mester menciona cu 111Repair tabata suministra piesa- y ekiponan na Albatros Airlines desde 2017. Sinembargo, na 2019, e aeroliña Venezolano a cuminsa cay atras den pago pa e servicionan ricibi, pa cual e compania Mericano a entama un demanda den un corte di Florida.
Pa augustus 2023, e decision di corte Mericano tabata cu Albatros Airlines mester paga 92.931,- dollar mas interes di mas di 9% anual. Tambe 400.000 dollar mas e mesun porcentahe pa cada aña di retraso.
Acudi n’e autoridad di Corsou
Despues di e embargo di e avion, e apoderadonan di e aeroliña Venezolano a entama un ‘kortgeding’ cu e meta di anula e decision.
Segun e relato di e sentencia hudicial, “e interes di Albatros den kita e beslag ta pa e compania sigui opera ya cu e no por transporta pasahero door di e beslag y pa cual e lo keda sin entrada.”
Albatros a argumenta, tambe, cu e avion tuma den beslag, “ ta comprometi cu otro compania” segun un sentencia di corte Venezolano di dia 27 di februari 2023.
Hues Solange Christiaan a indica cu “tampoco no ta cla cu a transferi propiedad di e avion, manera supuestamente a acorda y conforme cu loke ta registra den e sentencia di e corte Venezolano. For di e certificado di registracion original, tuma den beslag pa e autoridadnan, ta resulta cu e avion ainda ta propiedad di Albatros.”
E compania aereo Venezolano a indica cu e lo paga un parti di suma atras a cambio di e liberacion di e avion, como tambe e lo compromete na cancela, cada kincena e resto di e debe cu e ganashi di e vuelonan.”
Durante tratamento di e caso dia 29 di februari 2024, “111Repair a declara cu e no ta confia di cu Albatros lo cumpli cu e acuerdo e biaha aki.”
