Actualmente tin 812 mucha na Aruba, cu ta bay scol sin desayuno diario. Pa esaki Ban Uni Man pa Cria Nos Muchanan ta bishita 65 scol tur rond di Aruba, pa provee desayuno pa nan.
Pa hopi di e muchanan aki, esaki ta nan prome cuminda grandi di dia y te hasta, e unico cuminda di dia.
Por bisa cu hopi den nos comunidad ta afortuna, cu esaki no ta nan caso. Pero si e ta un realidad di nos isla, pa 812 mucha.
Malta Balashi ta kere den e vision di Ban Uni pa Cria Nos Muchanan pa provee tur e muchanan den nan necesidad di desayuno, e cuminda mas importante di dia. E muchanan cu ta cuminsa nan dia c’un desayuno tin mas energia y ta enfoca pa destaca durante dia, cual ta crucial den un experiencia educativo y productivo.
Pa esaki, Malta Balashi tin e honor y orguyo pa ta un aliado di Ban Uni Man pa Cria Nos Muchanan. E ta un organisacion cu e meta di provee mas tanto mucha posibel, di un desayuno diario.
Desde 2013 Malta Balashi ta un aliado y e ta invita e pueblo di Aruba pa uni hunto cu nan n’e bon causa aki. Haci esaki posibel door di cumpra bo Malta Balashi pa yuda engrandece nan forsa pa yuda mas tanto mucha den necesidad posibel.
Ban Uni Man pa hunto cria nos muchanan. Di e manera aki ta sigura cu e chikitonan di nos comunidad ta cuminsa e dia rib’e bon pia.
