Diferente unidad di polis, incluyendo team special di aresto (RRT) a presenta den area di Bushiri pa un persona cu cuchiu den man menasando su ex-pareha den parkinglot. Na yegada a bin compronde cu e persona aki lo a bandona sitio pero no a bay mucho leu.
Aproximadamente 11:45 am a drenta informacion, cu un homber cu cuchiu den man tabata menasa un hende den parkinglot di Bushiri Complex. Mientras un patruya tabata yegando e sitio, un persona a haci señal pa e para. Tabata trata di e victima band’i caminda, cu a duna nan tur datos mesora di locual a tuma luga.
E otro patruya a presenta na Bushiri, pero no a topa cu e sospechoso. A compronde cu e lo a bandona e sitio pero tabata rondona e aera den un Nissan March numera 15063. A señala dicho vehiculo den area di Madiki y aki ta caminda a bin topa cu ne y dun’e ordo pa para.
Na prome instante e no tabatin intencion di para pero na final el a pense miho y a para. Na sitio a compila algun informacion adicional caminda cu a indica cu e tata di e sospechoso aki lo tabata direccion Bushiri riba bicicleta pa yud’e piki su pañanan pero no a logra mirando cu a deten’e un poco mas leu di caminda e tabata.
A transporta e sospechoso aki pa warda di recherche pa duna declaracion di su actonan y despues pa warda di Shaba.
