Un discusion formal entre bisiña por poco a caba na desgracia. Homber a sali ta grita y menasa su bisiña y esaki no a perde pa gana y a yama polis mesora p’e.
Den careda di 4:00 pm un patruya a presenta na un adres na Moko y bin topa cu un homber lomba afo y machete den man. No mucho despues, dos otro patruya tambe a yega sitio pa reforsa nan colega. Segun por a compronde, e homber aki lo tabata cortando mata of haciendo limpi den cura pero a dicidi di bay direccion di e cura di e bisiña y cuminsa busca problema cu nan. No ta conoci e origen di e discusion.
Situacion a escala y e homber a saca e machete cu e tabatin bon scondi den su carson parti patras y zwaai esaki den direccion di e bisiña. Na yegada, en berdad e polis a bin haya e homber cu machete den man ta zundra.
A pidi e persona pa baha e machete, calma su mes pa asina por a tuma datos di ambos partido. A splik’e tambe cu e estilo di ‘machetazo’ den bario no ta algo cu ta aceptable riba nos isla. No por cana menasa hende gewoon asina rond cu arma den man y kere nada ta bay pasa. Polis a pone boei na man y deten’e na sitio, pa despues transport’e pa un warda di polis.
