“Avoid travel to Aruba”, esey ta e conseho cu Centers for Disease Control and Prevention (CDC) di Merca ta publica riba e portada di su website den categoria “travel notices” unda ta conseha pa no biaha. Mas leu nan ta skirbi “If you must travel to Aruba, make sure you are fully vaccinated before travel”. Aruba pa algun luna tabata riba e lista di alerta cora, nivel cuater, cu a stroba nos di haya hopi turista. A dura algun luna prome cu nos por a domina e virus y baha for di e lista aki. Pero desde awe, despues di algun siman, ata nos riba dje atrobe!
Centers for Disease Control and Prevention (CDC) di Merca a duna di conoce cu Mericanonan, hasta si nan ta completamente vacuna, cu biaha pa Aruba ta peligroso pasobra lo por contagia toch cu un variante di Covid-19. Ta conseha pa tur biahero cu bin Aruba, pa nan sigui recomendacionnan y rekisitonan di autoridadnan local, cu ta inclui bisti tapaboca y keda 1,5 meter leu for di otro.
Ki ora ta adapta e Travel Notice pa un destinacion specifico? E contesta ta cu Centers for Disease Control and Prevention (CDC) di Merca ta monitorea casonan diario cumulativo durante un periodo di 28 dia consecutivo. Ora nota cu nan ta subi mas cu baha, automaticamente e destinacion ta bira di risico y ora cu e bay fo’i man, manera ta na Aruba awor, cu automaticamente ta duna un conseho negativo pa bishita e destinacion.
Como consecuencia di e alerta cora aki, nos lo por spera mas cancelacion di gruponan interesa pa bin Aruba cu vakantie of pa bishita di trabou. Asina aña pasa nos a conoce un bon luna di juni y un tremendo juli, pero ora cu a pone nos riba e famoso lista cora aki na augustus, mesora a mira un caida drastico den nos cifranan. Asina por mira, cu no ta Gobierno di Aruba so por pone restriccion cu consecuencia devastado pa economia, pero aki por nota cu ni si Gobierno di Aruba no actua mes, cu esun di Merca ta tuma decision pa nos y cu resultado aun pio!
Ora afecta operacion na nos aeropuerto, den forma di menos vuelo, cancelacion di vuelonan of menos pasahero riba cada avion, ta traduci mesora den menos entrada pa nos pais. Nos aeropuerto ta fungi como e “cash register” di nos pais pasobra di aki tur placa ta drenta pa e unico pilar economico di nos isla, esta turismo. Asina cu turismo cay, nos economia ta nota e consecuencia inmediatamente. Awor ta spera cu e temporada aki por pasa lihe y cu pronto nos ciudadanonan por cura y cu e cifranan por baha. Pero atrobe, mester tuma no menos di 28 dia di caida constante, prome cu CDC cambia e conseho di biahe pa uno mas positivo pa Aruba. Nan no ta tene cuenta cu aspectonan economico ni turistico, sino solamente ta mira aspectonan di salud publico y risico di contagio.
CDC ta conseha, por lo general, pa no biaha pa ningun otro pais pafo di Merca si bo no ta completamente vacuna. Tuma e vacuna ainda ta e miho manera pa proteha bo mes for di e virus, pa reduci e plamamento di Covid-19 y reduci e cantidad di variantenan. E departamento di salud publico di Merca ta hasta encurasha tur ciudadano pa tuma e booster, den caso cu bo ta bini na remarca. Esunnan cu no ta completamente vacuna lo mester sigui recomendacionnan adicional prome, durante y despues di biaha.
Reglanan adicional ta indica cu tur pasahero, incluyendo Mericanonan vacuna of no vacuna, mester presenta un Covid-19 test negativo haci un dia prome cu biaha. Mucha bou dos aña no mester test. Esaki ta conta tambe pa hendenan cu por prueba cu nan a caba di recupera di Covid-19 den e ultimo 90 dianan. Den caso cu bo no ta vacuna of no completamente vacuna, ta recomenda pa keda cas den cuarentena cinco dia despues di yega bek Merca for di biahe.
