E ciudadanonan Botello, Peña Bermudez y Peña Bermudez a cana un caminda di cruz, pero finalmente awe, dos aña y cinco luna despues, cu a tira nan casa y tata mata, porfin nan a logra haya oido. Corte Comun di Caribe Hulandes (Hof), den cual tin tres hues ta sinta na cabes, a dicidi cu mester persigui e dos polisnan y trece nan dilanti mesa berde, pa laga un hues dicidi si nan ta culpabel of no. Pa famia, esaki ta un logro pasobra no cuanto nan a roga y pidi, fiscal semper a sali na defensa di e polisnan y a laga nan como famia den scuridad atras, sin nan cas y sin nan tata. E huesnan sinembargo a nota cu aki ta trata di un inhusticia y a dicta na fabor di famia.
E caso
E caso aki a sosode dia 28 di september 2020 ora cu e homber W. Bermudez, kende tabata bou influencia di alcohol atrobe na cas, tabata causando problema na su cas situa na Sero Pita. Door di esaki mes e casa y su dos yiunan a dicidi pa pidi ayudo di polis pa domin’e y calm’e. Varios unidad policial a acudi na e sitio y e situacion a escala durante su detencion. E homber a sconde den camber y ora a bis’e cu ta polis y pa e habri e porta, el a sali pafo cu un boter kibra, cu polis a considera por bira un arma contra nan. Mirando e comportacion agresivo di e sospechoso, dos polis a dicidi di saca nan arma reglamentario, a avisa e homber pa benta e boter abou y ora cu el a nenga di haci esey, a opta pa los tiro cu a resulta fatal.
A reconstrui e echonan
Dia 14 di november 2022, e autoridadnan a organisa un reconstruccion na e cas envolvi, situa na Sero Pita. Ey tabata presente e famia, pues e mama y e yiunan, compaña pa nan abogado. Fiscal tabata t’ey cu demas funcionario di Ministerio Publico. Mando policial a presenta pa mira kico a pasa exactamente. Tur e polisnan cu tabata t’ey e dia di tiramento tambe a presenta pa haci tur cos di nobo, bou wowo di tur presente. Tambe hues comisario a presencia e reconstruccion pa mira cu propio wowo con e cosnan a bay, di acuerdo cu proces-verbaal cu e polisnan a traha riba e incidente. Parce cu na final di e reconstruccion, e hues comisario mes lo a bisa e dos polisnan cu no ta mira motibo pa persigui nan, pasobra ta hopi obvio cu aki tabata trata di defensa propio.
Decision di fiscal
Ministerio Publico, despues di un evaluacion, a dicidi cu aki ta trata di defensa propio, pa cual a dicidi cu no ta persigui e polisnan. E decision aki no a cay na agrado di famia, cu a cuminsa cana nan caminda pa haya husticia pa nan ser keri. Nan ta considera cu a tira nan tata mata innecesariamente. Famia ta acusa e dos polisnan cu a tira, esta Jerrick E. Boekhoudt y Nelson E. Salas-Sanchez, di a actua for di control, a abusa di nan poder y a tira e homber indefenso mata. Tambe famia a convence e huesnan cu nan tabata cuater polis den e cas y por a domina e homber facilmente uzando forsa. Pero no, nan a scoge e caminda di mas facil, dos di nan a saca arma y tira. E casa y yiunan a bisa hues cu nan a yama polis pa yuda nan, no pa bin mata nan tata nan dilanti den nan cas!
Pa mas lesa TREMPAN.COM
