Minister Plenipotenciario mr. Ady Thijsen riba invitacion di secretario general di Ministerio di Defensa Gea van Craaikamp tabata presente na un recepcion special na Sociëteit de Witte pa tuma despedida di Commandante di Koninklijke Marechaussee luitenant-generaal Hans Leijtens.
Den su discurso van Craaikamp a gradici luitenant-generaal Leijtens pa su bon trabao cu el a bin ta haci pa Koninklijke Marechaussee. Tambe pa e echo cu despues di a bandona servicio di Koninklijke Marechaussee a regresa bek na momento cu a haci un apelacion riba su persona. Esaki segun van Craaikamp ta demostra e lealtad di luitenant-generaal Leijtens pa Defensa y particularmente e division di Koninklijke Marechaussee.
Despues di e parti formal, Minister Thijsen a haci uzo di e oportunidad pa desea luitenant-generaal Hans Leijtens tur clase di exito den su funcion nobo como director ehecutivo di Frontex. Esaki ta un agencia special di Union Europeo pa brinda cooperacion entre e paisnan miembro di Union Europeo pa loke ta trata e frontera entre Europa y e paisnan no Europeo.
E mandatario a saluda y gradici van Craaikamp pa e invitacion. Van Craaikamp a yega di ocupa e posicion di director Koninkrijksrelaties na e Ministerio di BZK.
