Diabierna mainta e trahadonan di Bureau Interne Diensten (BID) a bay den welga dilanti di oficina di Departamento di Recurso Humano (DRH). Nan ta sinti cu tur trahado di tur otro departamento ta bay dilanti, pa loke ta schalering, pero menos esunnan di BID. Ya ta dies aña cu DRH ta priminti cu e ‘formatie rapport’ ta cla y cu lo implement’e.
N’e sitio tabat’ey presente, sindicato TOPA y a pidi pa papia cu e directora, Omaira Lares. Sinembargo, Lares no tabata na oficina y tampoco e director suplente, Gilbert Wernet. E di tres persona encarga tabata esun cu a sali pafo pa asina atende cu e trahadonan.
Alonso Tromp, Presidente di Sindicato TOPA a cuminsa na bisa cu ta for di September aña pasa cu e Famoso ‘Formatie Rapport’ ta cla pero DRH ainda no tin fin di implement’e. dentro di 4 luna ta haci un aña cu e rapport aki ta cla y te ainda nada. Despues di un reunion cortico cu DRH, sindicato TOPA a bay di acuerdo pa un reunion dialuna awo, 27 di mei pa 2:30pm.
Ta spera cu dialuna tin un contesta fiho si lo cumpli cu nan.
Tromp a sigui bisa cu, ta exigi pa e trahadonan cumpli cu nan labornan, pero nan no sa unda “nan ta para.” Tin algun di e trahadonan tin mas di 15 aña sperando pa drecha nan schalering.
Vocero di trahadonan di BID, Eugene Kelly, a bisa cu e trahadonan ta hopi frustra, pasobra cu nan ta manda nan di cashi pa muraya. Ta exigi pa e trahadonan duna nan maximo esfuerso na trabou, ya cu a bin c’un ‘Formatie Management.’
Pero segun Kelly, ainda no tin structura. Ta bisa cu tin un formatierapport, pero e ta wanta y nan kier sa e motibo pakico tin e wanta. Y awo nan a cansa.
BID tin mas o menos 60 trahado. Y segun Kelly, nan ta e curason di Gobierno. Y net nan ta haya un mal trato.
Por ultimo, Kelly a bisa cu no mester warda te ora cu eleccion bin, pero ta for di hopi tempo caba mester a bin c’un solucion.
E trahadonan ta sinti cu, pa nan por eherce nan trabounan optimalmente, nan mester tin trankilidad laboral.
