Diadomingo un tiki despues di 11’or di anochi, a drenta informe cu riba caminda di Catiri lo a sosede un accidente, pero cu esun cu a caus’e, lo a sigui su caminda.
T’asina cu riba e caminda di Catiri bayendo noord un Honda Odyssey tabata core, ora diripiente ta topa cu un auto Hyundai i10 bayendo zuid. Aki e Hyundai i10 a dal raspa den e Honda, pero en bes di para, e chauffeur di e Hyundai i10 a dicidi di sigui core. Un auto cu tabata dilanti e Hyundai i10, a nota e accidente y cu e chauffeur tabata sigui core. P’esey e automobilista a baha speed y asina pone cu e chauffeur no a logra huy full speed. Esey a duna e chauffeur di e Honda Odyssey e chance di bira su vehiculo y bay tras di e Hyundai mientras tabata yama y informa Polis kico a caba di pasa.
Na altura di e misa di Tanki Leendert a logra para e auto Hyundai y aki e agentnan policial a nota cu e chauffeur no tabata apto pa sigui core su auto. A detene e chauffeur di e Hyundai y a solicita pa transportwagen, mientras e otro partido a keda na e sitio, wardando pa esnan di e compania di seguro yega na e sitio.
