Segun e plan nacional di vacunacion contra COVID-19, na e momento aki ta enfoca riba vacunacion di esunnan di mas risico pa contagia cu COVID-19, esta nos adulto mayor riba 60 aña. Di e grupo aki tin un total di 23.000 persona riba 60 aña. Pa por yega entre 75%-85% di vacunacion di e grupo aki, mester vacuna entre 17.250- 19.550 persona riba 60 aña di edad. Gobierno a anuncia cu lo uza 4 localidad pa duna vacuna.
Entre e dos localidadnan cu actualmente ta funcionando como centronan pa vacuna, Centro Deportivo Libertador Betico Croes na Santa Cruz y Santa Teresita Center na San Nicolas, ta vacunando 1000 persona pa dia sin mucho contratiempo. Por scucha hopi bon comentario for di diferente ciudadano riba e proceso, con rapido, facil y placentero esaki tawata pa nan.
Actualmente a vacuna 3787 adulto di 60+ caba na e dos localidadnan existente y entrante awe dialuna ta cuminsa opera e localidad na Noord, club Don Bosco. E lo ta operacional riba dialuna y diamars so. Club Don Bosco na Noord lo intercambia operacion cu Santa Teresita na San Nicolas. Riba dialuna y diamars cu club Don Bosco ta activo, Santa Teresita Center lo ta cera y riba diaranson y diahuebs cu Santa Teresita Center ta opera, club Don Bosco lo ta cera. Na tur e localidadnan di vacuna tin rampa pa uzo di rolstoel y tambe tin extra rolstoel pa brinda servicio na esun cu mester.
Ta haci un suplica grandi na comunidad, pa na momento cu un adulto di 60+ mester bin vacuna y mester un acompañante, pa laga esaki ta unicamente un (1) persona. No tin mucho espacio pa acompañante sinta warda y esaki por bira aglomeracion. Tambe ta haci un suplica pa bin na e orario stipula, no bin prome cu esaki. Cada 30 minuut ta schedule un cantidad di persona. Si bo yega prome cu bo orario, bo tin pa keda warda esunnan cu tin cita prome y esaki por dura bo mas cu ta necesario. P’esey yega cerca na e orario stipula. Si bo ta poco trempan, keda sinta den auto tambe ta yuda pa no mester keda para den fila pornada.
Entrante dialuna dia 1 di maart lo introduci cambio den orario di vacunacion na e diferente localidadnan. E orario nobo lo ta di dialuna pa diasabra for di 8:30 am pa 11:30 am y for di 2:30 pm pa 5:30 pm. Diadomingo lo ta un dia liber p’e empleadonan por descansa.
