El a cumpli su meta di keda 100 dia bou tera cu meta pa recauda fondo pa yega su un edificio di Mega Museo Aruba. Ta riba 2 di october 2021, pa ta exacto 5:00 pm ora cu Heintje Ras a drenta e mina di fosfaat na Sero Colorado y a keda 100 dia bou tera. Cu esaki, si tur cos ta bon, Heintje ta kibra e record mundial y lo bay den Guinness World Records.
Awe algun rato despues di 5:00 pm Heintje Ras a sali for di e mina di fosfaat. E 100 dianan no a bay facil, a conta cu sosten di su famia y un grupo grandi di boluntario.
Manera ta conoci, Heintje tin un pasion pa e mundo di coleccion di articulo, artefacto y obhetonan anticua. Na su cas e tin disco, tocadisco, hero di strica, telefon, camara, mashin di mula y hopi mas articulo di antes. Su cas a bira mucho chikito pa tanto articulo, for di cushina, sala, patio y hasta camber ta completamente yen cu e articulonan anticua.
E tin mester di fondo pa construi un museo y cumpra un tereno. Aunke durante un conferencia di prensa, Heintje a yega di menciona cu e no a ricibi cooperacion di gobierno pa cu un tereno. Awe den un forma di sorpresa, Minister Rocco Tjon a honr’e na nomber di Gobierno di Aruba pa cu su hazaña.
Ta spera cu mesun energia cu Minister Tjon tabatin pa crusa brug y tira un speech dilanti un multitud grandi, cu e lo tin mesun gana di regla pa Heintje cumpli su soño.
Na su salida, el a comenta cu locual mas el a sinti falta di dje tabata e presencia di su yiunan. E ta contento di a logra su meta y cu ta danki na Dios el a logra. A invita tur miembro di prensa pa ta presenta diabierna awo pa un conferencia, pero toch a haci un esfuerso pa ricibi prome reaccion di Heintje Ras. Ras a comenta cu diabierna e lo bay den detaye di cuanto fondo a logra recauda y si esaki ta suficiente pa construccion di un Mega Museo. Segun Heinte, e organisacion di Guinness World Records a bishit’e dos biaha y a hacie un cantidad di pregunta. Ras tin cinco luna pa registra su hazaña na Merca, esta na e organisacion di Guinness World Records.
