Na Museo Arqueologico Nacional Aruba a tuma luga apertura riba e tayer tocante Solucionnan di Conocemento Tradicional pa Adaptacion na Cambio di Clima y Resiliencia den Caribe. A conta cu presencia di Gobernador S.E. Alfonso Boekhoudt, como Minister di Enseñansa, diferente orador y participante n’e tayer.
dr. Harold Kelly, arkeologo di Museo Arqueologico Nacional Aruba, a splica cu e prome dia tabatin presentacion riba Solucionnan di Conocemento Tradicional pa Adaptacion na Cambio di Clima y Resiliencia den Caribe, mientras dos dia di tayer riba e tema aki. Aki nan ta bay intercambia conocemento tradicional y ki solucion nan por tin p’e efectonan di cambio di clima cu ta bay experencia di awo pa futuro. A conta cu presencia di diferente hende indigena tradicional di region Caribe y professor cu ta haciendo investigacion den cambio di clima y con esaki ta afecta mundo. Hunto cu nan ta bay mira con pa yega na un solucion. Ta combina e dos tipo di conocemento tradicional y conocemento cientifico pa mira ki solucion por logra p’e efectonan dje cambio di clima.
E preparacion p’esaki tabata uno hopi largo. Desde maart a cuminsa prepara pa invita e hendenan y bay di acuerdo pa por a bin. E parti hopi dificil tabata pa haya tur hende aki, pa motibo cu e parti di biahamento den Caribe ta un problema basta grandi. Mester a hinca hopi tempo den esey y despues a percura p’e partinan cu tabata falta. E tabata par di siman pa haci yen cos, pero Kelly ta contento cu tur hende a yega y asina ey tene e tayernan.
Diahuebs 6:30-8:30 pm tin encuentro publico cu algun persona indigena tradicional di region, di cual tin ta di Aruba. Ta bay tin un panel. Segun Kelly, nan ta bay haci pregunta riba e cambio di clima y con nan ta anda cu esey, y despues publico por papia cu e panelistanan. E entrada ta uno gratis y e ta spera cu publico asisti pa motibo cu tin persona cu ta echt indigena.
dr. Andrea Richards, coorganisado di tayer, a splica pa motibo di su investigacion di phd. E ta mira e balor di data dje cultura integra con nan ta planea p’e cambio di clima como esunnan cu ta biba riba e isla of pais den region. Un di e cosnan ta e conocemento tradicional y p’esey a dicidi pa tene e tayer aki. Asina ey pa trece e comunidad cu e investigadonan pa comparti informacion. El a sigui indica cu asina ey por mira si por desaroya bon strategia p’e region.
