Un accidente basta fuerte a sosode den ora di mainta na Palm Beach. Un polis coriendo riba e caminda di preferencia direccion pabou, a dal fuerte contra TX-414 cu a subi caminda sin duna preferencia.
El a sali for di e area di Ex Aruba Bank pa lora man robes direccion Noord. Tur cos ta mustra cu e no a mira e brommer ta bin. Segun por a compronde cu e polis lo mester tabata na caminda pa yuda un otro colega cu a pidi ayudo (versterking). Na momento cu e tabata bayendo e asistencia ey, e taxista a sali su dilanti.
E polis a dal y bay halto cay riba caminda. A pidi ambulance cu urgencia. E polis tabata na tino y a bay hospital cu ambulance. E taxista tambe ta coredo di brommer y a sinti su mes extra fastioso cu e accidente cu el a comete.
Polis di trafico a bin investiga. Tambe a mira presencia di comisario di polis Robert Candelaria na e sitio. Djey e comisario a bay hospital pa mira situacion di su colega. E impacto tabata fuerte mirando e daño material. Segun por a compronde cu e agente policial lo a keda interna debi na e slanan cu el a ricibi.
