Biñis Montero ta habitante di Calabas 35 D, y tin problema di coriente pa 3 luna y ainda no tin un solucion. A pidi pa yega na un solucion algun luna atras, pero awo cu nan ta den e situacion di aislamento nan no tin coriente. Aki ta trata di un famia di 18, kendenan tin nan yiunan y mayoria di nan ta traha den hotel, restaurant y construccion. Awo nan tur ta na cas y e situacion a bira mas fastioso.
E yiunan cu ta hayando les via internet no por haya nan les. E preocupacion mas grandi ta cu nan no tin coriente, e bisiñanan ta sali y comunica cu otro. El a sigui bisa cu si un di nan haya e virus aki, esaki lo pega nan tur. Nan ta pidi Minister Evelyn Wever-Croes pa yuda nan, pasobra nan mester di e coriente.
Loke ta importante pa awo ta e coriente ya cu muchanan por haya nan les y sigui bay padilanti. Pa 3 luna largo nan ta haciendo uzo di delco, pero varios di nan a daña. E situacion aki no por sigui asina mas, tur dia mester cumpra gasolin y no por haci uzo di delco den dia y anochi. E situacion aki ta fastioso y p’esey ta pidi tur minister, specialmente Minister Wever-Croes, pa yuda nan.
Nan mester yena algun formulario cu cierto rekisito p’e Fase helpdesk pa por adkiri ayudo. Nan ta den e proceso ey unda cu nan a ricibi un number pa yama. Ki ora cu nan yama e number, esaki ta ocupa of no ta contesta. Un compania a haci esey su mes pa su empleadonan. E compania di construccion a duna nan e formulario pa yena esaki y sigui e rekisitonan. E 24 muchanan no ta bayendo scol y awo ta ricibiendo les online y no por haci hopi cos. Nan mester di coriente pa por haya internet y e bida sigui, asina Montero a bisa.
Kimberli Medina ta un studiante y ta biba na Calabas 35. E situacion di e virus ta afecta nan tur, pasobra ta bisa pa nan keda paden. Tin delconan daña caba y no por keda paden den calor. El a bisa cu nan no por cende airco, no tin coriente y el a perde hopi les caba. Kimberli Medina ta pidi Minister Wever-Croes pa yuda nan. E tin proyectonan pa entrega y nan tur mester di coriente. Loke e ta pidi pa pone coriente ya cu anochi e no por studia. Ta cende y paga e delco desde 7:00PM te cu 7:00AM, esey ta pone cu mester lanta trempan. Asina cu paga e delco paden di cas ta calor.
