Fin di aña escolar ta yegando su final. E alumnonan lo pasa pa otro klas, otronan lo gradua y asina e ciclo ta cera y cuminsa bek di nobo.
Pero no mester lubida cu landamento escolar tambe ta cera su ciclo, na momento cu e muchanan di derde klas mester pasa nan examen di landamento pa haal nan diploma A y B. Gwendolyne Kock-Croes, coordinador landamento escolar pa e scolnan di Noord, Oranjestad y bisindario a indica cu e examennan a cuminsa caba dialuna, 26 di juni y lo caba diabierna 30 di juni.
Landamento escolar ta cuminsa ora cu scol cuminsa. Den e prome les ta parti e muchanan den dos grupo y asina ta test nan pa wak kico nan por y kico no. durante e aña nan ta bin un biaha pa siman pa haya zwemles y awo na final ta haci nan examen.
Mas aleu, Kock a bisa cu siman pasa nan tabatin test di e muchanan cu ta haci test di certificaat, cu ta consisti di test di cangreu y strea di lama. Esunnan cu tin diploma halto caba, ta haci test di bulado y heroe di rescate. Y e siman aki tin esunnan mas importante, cu ta A cu B.
Loke por a nota den e ultimo añanan ta cu tin varios scol tin alumnonan cu tin diploma ta bin les, pero tambe tin algun scol unda cu nan alumnonan no sa nada y aki ta unda cu e instructornan di landamento lo mester traha y pusha un tiki mas duro cu e muchanan aki. Berdad ta haya muchanan cu tin miedo di awa, pasobra cu nan ta bisa cu nan no ta yega lama, pa cualkier motibo. E ora e instructornan ta bay traha cu nan, siña nan pa sobrepasa nan miedo. Segun e muchanan aki ta gana confiansa nan ta gusta, vooral si e dia ey nan ta bay pool.
Les di landamento na scol ta sirbi di estimulo tambe p’e muchanan aki e dia di mañan tambe por sigui den landamento, ya cu nos isla ta rondona di lama. Un dia cu nan cay na awa, nan ta defende nan curpa y hasta e muchanan cu tin certificado por defende nan curpa, pero nan no a logra pa haya un diploma.
Ta importante pa un mucha siña tin confiansa den awa pa cual ta importante pa nan sigui cu lesnan di landamento despues cu nan obtene nan certificado of diploma for di Landamento Escolar. Ora cu nan logra e dosnan aki, nan por afilia nan mes na un di e clubnan di natacion cu ta existi na Aruba y crece mas den e ramo di deporte aki, pa yega na nan diploma F. Asina nan por sigui crece den deporte acuatico.
Por ultimo, Kock a gradici tur e instructornan di landamento, cual ta un grupo chikito pa asina hopi scol, rond di 40 y cu ta duna les na mas di mil alumno, garantisando siguridad di tur e muchanan. Pa nan, landamento ta nan pasion y nan kier siña e muchanan esaki.
