Ora mal tempo ta na caminda, tur instancia, y media ta contribui na comunidad, avisando cu tin un peliger na caminda y cu hende mester prepara.
Mas cu 2000 aña pasa Dios a stima mundo asina tanto cu E a manda su Yiu unigenito, pa ken cu kere den dj’E no bay perdi ma tin bida eterna.
Hopi a kere ,pero tambe hopi a rechasa, y hopi awendia no ta sinti e necesidad pa kere, y hopi a aparta for di e caminda.
Y hasta tin ta kere cu nan por biba manera nan kier den tur sorto di bagamunderia y idolatria, pensando cu toch Dios ta contento cu nan.
Mas leu ainda tin ta biba na banda di e caminda di Dios, y nan ta pretende cu nan ta riba e caminda, pasobra nan kier come for di e mesa di diabel y e mesa di Dios.
Pero Dios den su inmenso amor a manda advertencia serio pa tur esunnan cu ta duda, cu ta tarda pa entrega nan bida,of cu no kier entrega nan bida, y ta destina nan mes pa perdicion.
Di berdad, Mi ta bisa boso, e generacion aki lo no pasa, prome cu tur cos lo tuma luga. Cielo y tera lo pasa, ma Mi palabranan lo no pasa.
Tene cuidao, pa boso curason no ta carga pa causa di paranda,y buracheria y e preocupacion nan di bida, y e dia ey no bini diripiente riba boso manera un trampa.
Pasobra e lo bini riba tur esunnan cu ta biba riba superficie di henter mundo. Ma sea alerta tur ora bay, haciendo oracion pa boso por tin forsa pa scapa di tur e cosnan aki cu ta bay tuma luga y pa para dilanti di e Yiu di Hende (Lucas 21:34-36).
Den e buki di Revelacion 21:8 e bijbel ta splica claramente ta ken ta esunnan cu ta bay perdi, pero e sistema di e mundo awendia kier tapa solo cu un dede y ta purba tur momento pa sconde e berdad y hasta rechasa e berdad mescos cu e colebra a haci cu Eva den paraiso (Genesis 3:4).
E mundo aki no kier pa bo bisa un persona e berdad den su cara, pasobra nan ta considera esey como husgamento, pa nan sigui biba den pica, y asina rechasa Dios.
Awor aki tin cierto parti pais cu no kier pa haci oracion cu un persona pa libr’e for di gara di satanas, pero esaki ta locual cu Cristo a comanda nos (Marco 16:17).
Esun cu vence lo hereda e cosnan aki, y Ami lo ta su Dios, y e lo ta Mi yiu:
Ma e cobardenan (esunnan cu no kier para contra e sistema di mundo, pero cu ta acepta y apoya cosnan cu ta contra Palabra y boluntad di Dios pa beneficio personal).
E incredulonan (Esunnan cu a tende pero a rechasa e palabra di Dios y no ta kere den su unico Yiu).
Y e abominabelnan (Esunnan cu awendia ta haci tur cos pa mundo acepta nan cu kier cambia ley di Dios, y pone esun di nan preferencia).
E matado- y fornicadornan, e hacidonan di bruha, e adoradonan di Dios falso y tur gañado, nan parti lo ta den e lago cu ta kima cu candela y suafel, cual ta e di dos morto (Revelacion 21:8 y su splicacion).
E dia y e ora di e binida di nos Señor Hesus Cristo ningun hende no sa, pero nos mester ta prepara.
Sinceramente,
Pastoor Marcel Balootje.
