Recientemente fraccion di Movementu Alsa Nashon (MAN) a entrega e proposicion di cambio di ley den Landsverordening minimumlonen despues cu a haci cambio conforme conseho di Raad van Advies.
E iniciativa di e ley aki a inicia na october 2020, caminda e ley a bay pa SER y RvA pa conseho. Manera ta conoci actualmente den e ley cu ta regla tarifa pa sueldo minimo tin diferente tarifa di cual esaki ta mara na edad a base di porcentahe. Actualmente un persona cu tin 20 aña ta cobra 90% di e tarifa di sueldo minimo cu ley ta prescribi, 19 aña ta 85%, 18 aña 75% y 17/16 aña 65%.
Cu e proposicion di cambio di ley aki ta trece cu ne cu un persona for di su 18 aña ta cobra 100% di e tarifa di sueldo minimo cu ley ta prescribi. Motibo di esaki ta cu un persona for di 18 aña bay ariba cu pa ley ta un mayor di edad y cu ta haya e derecho di por atende tur su cosnan legalmente su mes sin mester di autorisacion di entre otro su mayornan.
Segun International Labour Organization (ILO) tur hende cu ta labora mester ricibi pago igual pa trabou igual (equal work, equal pay). Tambe un persona cu tin 18 aña cu ta laborando tin e mesun derechonan cu esun di 21 aña y no ta conoci diferencia entre e gastonan di costo di bida.
Minister di SOAW Larmonie-Cecilia durante rueda di prensa di ultimo caminda a anuncia aumento di sueldo minimo, minister a pone atencion riba sueldo minimo hubenil y a indica di ta consciente di e iniciativa di ley cu ta canando. Nos ta contento cu minister ta mira e importancia pa trece cambio den sueldo minimo hubenil.
Fraccion di MAN ta dispuesto pa sinta cu minister di SOAW pa delibera y intercambia riba e proposicion riba mesa. Fraccion di MAN ta mira cu e cambio aki lo carga sosten di parlamento mirando cu ta pa trece igualdad den pago di salario na e trahado.
