Nos tur mester corda e palabra nan cu nos a siña for di chikito: Gloria na Dios den haltura, y na tera pas memey di hende cu ta agrada’E (Lucas 2:14).
Si nos ta bisa cu nos tur ta yiu di Dios, con por ta posibel cu tin meymey di nos tin hendenan cu no kier agrada y no kier respeta Dios su autoridad?
Tur cos ta cuminsa cu nos salbacion, nos bida entrega na Cristo Hesus cual no ta religion pero ta un relacion y un necesidad, pasobra Cristo Hesus mester tin e prome luga den nos bida.
Ora un persona ta agradabel pa bo, ta nifica cu e persona, ta respeta bo, e persona ta admira bo, y e persona no ta ofende bo, asina e ta demostra cu e ta agradabel y por forma parti di bo kring di amistad, cual ta algo normal den nos tur su bida. Nos Dios merece mas cu esey.
E mensahe den Lucas 2:14 no ta cualkier mensahe, e ta un base pa bida. E ta un pilar cual por wordo uza pa edifica famia riba dje, pasobra ta masha importante ora hende ta agrada Dios.
Ora nos ta agrada Dios, E ta warda nos curason den un posicion di victoria (Filipensenan 4:6-7). E ta duna nos un mente positivo, goso, salud, husticia y speransa.
Ta imposibel pa nos por agrada Dios cu dobel animo, cu rechaso di Su palabra y principionan, cu dobel personalidad, cu orguyo, arogancia,cu curason dobel inconstante den tur nos camindanan, conociendo e berdad, pero ta apoya maldad, pa amistad, y iresponsabilidad.
Ora bo tin dos mayor cu ta bebe y droga tur dia, no por tin paz na cas entre nan y e yiunan. Pasobra na prome luga nan comportacion no ta den boluntad di Dios y nan mes como mayor ta trece dolor y angustia den cas. Y ta stroba e muchanan di por crece bon y agrada Dios.
Cada decision cu nos ta tuma, nos no mester wak riba hende pa complace cu hende. Pero tene cuenta si e decision ey ta agrada Dios, pasobra locual awe nos ta sembra cu harimento, mañan e por bini bek pa nos den lagrima. Pasobra nos a wak riba hende y no a agrada Dios.
Ta mescos cu bo fia bo yiu menor di edad sin rijbewijs e auto di e compania caminda bo ta traha a confia bo cu ne, p’e sali cu su amigonan pa bay fiesta. Y mas despues polis ta yama cas y pidi bo pasa hospital urgente pa motibo di accidente. Nos mester ta responsabel ora di complace.
Tin engaño den curason di esunnan cu ta planea maldad, ma e conseheronan di paz tin goso (Proverbionan 12:20). Paz ta depende di puresa di curason di hende, hende cu curason impuro no tin pas, pasobra curason di hende impuro ta dividi.
No tin pas pa e malvadonan mi Dios ta bisa (Isaias 57:21).
P’esey hustifica pa medio di fe, nos tin pas cu Dios,door di nos Señor Hesus Cristo, door di kende tambe nos a haya entrada, pa medio di fe den e gracia aki, den cual nos ta para, y nos ta regociha den speransa di e gloria di Dios (Romanonan 5:1+2).
Aspira pa tin pas cu tur hende, y santificacion ,sin cual ningun hende lo mira Señor (Hebreonan 12:14 ). Nos ta yama pa sembra pas, y nada di discordia, nos ta yama pa curasha y no descurasha, nos ta yama pa bendiciona y no pa nos ta piedra di trompica.
